Trending

SEARCH YOUR FAVORITE STORY/ WRITER 🔍

Sunday, November 28, 2021

ഒരു ദിവസം അവൾ കിടക്കാൻ നേരം എന്റെ അടുത്ത് കൊഞ്ചി കുഴഞ്ഞു...

ഭൂമിക...

രചന: VICHU DE COEUR



ഞാൻ സച്ചിൻ. അമ്മയും അച്ഛനും എന്നേ സച്ചി എന്ന് വിളിക്കും. എന്റെ അനിയത്തി സ്വാതി പക്ഷെ എന്നേ സച്ചേട്ടാ എന്നാണ് വിളിക്കുന്നെ. ഞാൻ ബിടെക് കഴിഞ്ഞിട്ട് ഇപ്പോൾ ഒരു കമ്പനിയിൽ എഞ്ചിനീയർ ആയിട്ട് ജോലിക്ക് കയറി. എനിക്ക് 25 വയസ്സ് പ്രായം ആയി. അച്ഛന് ബാങ്കിൽ ജോലിയുണ്ട് പേര് കൃഷ്ണൻ. അമ്മ ശോഭ വീട്ടമ്മയാണ്. അനിയത്തി +2 വിനു പഠിക്കുന്നു.

എനിക്ക് 25 വയസ്സും അനിയത്തിക്ക് 17 വയസ്സും ആണ്. ഞങ്ങൾ തമ്മിൽ ഇത്രയും പ്രായവ്യത്യാസം ഉള്ളത്കൊണ്ട് സാധാരണയിൽ നിന്ന് വ്യത്യസ്തമായി എന്റെ കല്യാണം ആദ്യം നടത്താം എന്നാണ് അച്ചന്റേയും അമ്മയുടെയും തീരുമാനം. അനിയത്തിക്ക് ആണെങ്കിൽ ഇനിയും ഒരുപാട് പഠിക്കാൻ ആഗ്രഹം ഉണ്ട്. എത്ര നാൾ വേണമെങ്കിലും പഠിപ്പിച്ചോളാം എന്നാണ് അച്ഛന്റെ തീരുമാനം. ഇനിയിപ്പോ എനിക്ക് കൂടി ജോലി ആയത് കൊണ്ട് സാമ്പത്തിക ബുദ്ധിമുട്ടും ഇല്ല.

അങ്ങനെ ഒരു ദിവസം ഞാൻ ജോലി കഴിഞ്ഞ് വന്നു മുറിയിൽ ചുമ്മാ ഇരിക്കുക ആയിരുന്നു. അപ്പോളാണ് എന്റെ അനിയത്തി സ്വാതി എന്ന കുട്ടി കുറുമ്പി വല്ലാത്ത ഒരു ചിരിയോടെ എന്റെ അടുത്ത് വന്നത്. അവളുടെ മുഖം കണ്ടാൽ അറിയാം എന്തോ ഉടായിപ്പ് ഉണ്ടെന്ന്.

ഞാൻ : ” എന്താടി ഒരു കള്ളച്ചിരി. ”

സ്വാതി : ” ഹ്മ്മ് ഒക്കെയുണ്ട് ”

ഞാൻ : ” എന്താടി ഞാനും കൂടി അറിയട്ടെ ”

അവൾ നേരെ വന്ന് ഞാൻ ഇരുന്ന കസേരയുടെ കയ്യിൽ ഇരുന്നു. എന്നിട്ട് എന്റെ തോളിൽ കൂടി കയ്യിട്ട് എന്റെ ദേഹത്തു ചാരി ഇരുന്നു.

സ്വാതി : ” സച്ചേട്ടാ ഒരു കാര്യം പറയട്ടെ ”

ഞാൻ : ” പറയെടി പെണ്ണെ. ”

സ്വാതി : ” അതെ ചേട്ടന് വേണ്ടപ്പെട്ട ഒരു രഹസ്യം ഞാൻ അച്ഛന്റെയും അമ്മയുടെയും അടുത്ത് നിന്ന് ചോർത്തി ”

എനിക്ക് ഒന്നും മനസിലായില്ല. അച്ഛനും അമ്മയ്ക്കും എന്ത് രഹസ്യം അതും എന്നേ സംബന്ധിക്കുന്നത്.

ഞാൻ : ” അത് എന്ത് രഹസ്യം. പറയെടി ”
സ്വാതി : ” അങ്ങനെ ചുമ്മാ പറയാൻ ഒന്നും പറ്റില്ല. എനിക്ക് ചിലവ് ചെയ്യണം ”

ഞാൻ : ” അത് കൊള്ളാം. ഇതുവരെ ഒന്നും തരാത്ത പോലെ. ശെരി ഐസ്ക്രീം മതിയോ ”

സ്വാതി : ” പോരാ പോരാ. എന്നേ സിനിമയ്ക്ക് കൊണ്ടുപോണം ”

ഞാൻ : ” ഇങ്ങനെ ഒരു സിനിമ ഭ്രാന്തി ”

സ്വാതി : ” ചേട്ടന് അങ്ങനെ ഒക്കേ തോന്നും കാരണം ചേട്ടൻ എന്റെ പ്രായത്തിൽ ആഴ്ചയിൽ ആഴ്ചയിൽ സിനിമ കണ്ട് നടന്നിട്ടുള്ളതല്ലേ. എനിക്ക് അങ്ങനെ പറ്റുവോ. എന്നേ ഒറ്റയ്ക്ക് വിടില്ലല്ലോ. ആരെങ്കിലും കൊണ്ട് പോയാലെ എനിക്ക് ഇതൊക്കെ കാണാൻ പറ്റു ”

ശെരിയാണ്. എല്ലാ വീട്ടിലും ഇങ്ങനെ തന്നെയാണ്. ആൺകുട്ടികൾക്ക് നല്ല സ്വാതന്ത്ര്യം ഉണ്ട്. പെൺകുട്ടികളെ അങ്ങനെ ഒറ്റയ്ക്കോ കൂട്ടുകാരുടെ ഒപ്പമോ ഒന്നും സിനിമയ്ക്ക് വിടില്ല. അല്ല അച്ഛനമ്മമാരെ കുറ്റം പറയാൻ പറ്റില്ല. കാലം അതാണല്ലോ.എന്ത് സമാധാനത്തിൽ വിടും ഇവരെ പുറത്തേക്ക്. സത്യത്തിൽ ഇത് അപ്രിയം എങ്കിലും യാഥാർഥ്യം ആണ്. നമ്മൾ ആൺകുട്ടികൾ ആസ്വദിക്കുന്ന പല സുഖങ്ങളും അവർക്കില്ല. ഒരിക്കൽ കോളേജിൽ ഒരു രാത്രിയിൽ ഒരു ചങ്കത്തിയെ രാത്രിയിൽ ബൈക്കിൽ കറക്കാൻ കൊണ്ടുപോയത് ഞാൻ ഓർത്തു. ഈ രാത്രി എനിക്ക് നക്ഷത്രങ്ങളെ കാട്ടി തന്നതിന് താങ്ക്യൂ ടാ എന്നാണ് അവൾ പറഞ്ഞത്. എനിക്ക് അത് നിസ്സാരം ആയി തോന്നി കാരണം രാത്രിയേത് പകലേത് എന്ന് നോക്കാതെ ഒരു ആൺകുട്ടിക്ക് ഈ നാട്ടിൽ കറങ്ങി നടക്കാൻ സാധിക്കും എന്നാൽ പെൺകുട്ടിക്ക് അത് പറ്റുമോ. അവളുടെ മൊത്തം കോളേജ് ലൈഫിൽ അങ്ങനെ അഞ്ചോ ആറോ തവണ ആകെ ഇങ്ങനെ രാത്രിയുടെ സൗന്ദര്യം ആസ്വദിച്ചു കറങ്ങി നടക്കാൻ പറ്റി കാണുകയുള്ളു.

ഞാൻ : ” ശെരി ശെരി സിനിമയ്ക്ക് കൊണ്ട് പോവാം. നീ കാര്യം പറ ”

സ്വാതി : ” പ്രോമിസ്? ”

ഞാൻ : ” ദേ എനിക്ക് ദേഷ്യം വരുവേ. കൊണ്ടുപോകാന്ന് പറഞ്ഞാൽ കൊണ്ടുപോകും അതിൽ സംശയം ഉണ്ടെങ്കിൽ നീ പറയണ്ട ”

സ്വാതി : ” ഓക്കേ ഓക്കേ ഞാൻ പറയാം. അത് എന്താണെന്നാൽ ചേട്ടന് മൂക്കുകയർ ഇടാൻ പോകുവാ ”

ഞാൻ : ” എന്ത് ”

സ്വാതി : ” എടാ മണ്ടാ നിന്നെ പിടിച്ചു കെട്ടിക്കാൻ പോകുവാ. പെണ്ണിനെ അന്വേഷണം തുടങ്ങി. അടുത്ത ആഴ്ച എവിടെയോ പെണ്ണ് കാണാൻ പോകുന്നുണ്ട് ”

അവൾ പറയുന്നത് കേട്ട് ഞാൻ ഒന്ന് അമ്പരന്നു. അവൾ എന്റെ മൂക്കിൽ പിച്ചികൊണ്ടാണ് പറഞ്ഞേ. ഞാൻ അത് ഒന്നും അറിയാതെ ആലോചിച്ചു ഇരുന്നു പോയി. അമ്മയുടെ വിളി ആണ് എന്നേ ഉണർത്തിയത്. ഞാൻ സ്വാതിയെ മേത്തു നിന്ന് മാറ്റി അമ്മയുടെ അടുത്തേക്ക് ചെന്നു.

അമ്മയും അച്ഛനും കൂടി ഹാളിൽ ഇരിക്കുകയാണ്. ഞാൻ അങ്ങോട്ട് ചെന്നു. സ്വാതി പറഞ്ഞു തന്ന കാര്യം തന്നെയാണ് അമ്മ പറയാൻ പോകുന്നത് എന്ന് എനിക്ക് അറിയാം.

അമ്മ : ” എടാ ഒരു ആലോചന വന്നിട്ടുണ്ട് നിനക്ക്. പെണ്ണിന്റെ ഫോട്ടോ കണ്ടിട്ട് നല്ല ചന്തം ഒക്കെയുണ്ട് ”

അമ്മ അമ്മയുടെ കയ്യിൽ ഇരുന്ന ഫോട്ടോ എനിക്ക് നേരെ നീട്ടി. ഞാൻ ഒന്ന് നോക്കി. കാണാൻ നല്ല സുന്ദരി ആയ കുട്ടി. 20-22 വയസ്സ് പ്രായം ഉണ്ടാവും. ഒരു ഫുൾ ഫിഗർ ഫോട്ടോ ആയിരുന്നു. മെലിഞ്ഞ അത്ര അധികം വെളുത്തതല്ലാത്ത ഒരു സുന്ദരി. നിറഞ്ഞ പുഞ്ചിരിയോടെ ഉള്ള ഒരു ഫോട്ടോ ആണ്. എനിക്ക് അവളുടെ ചിരി തന്നെ നല്ല രസം ആയിട്ട് തോന്നി. ആ ചിരി കണ്ടാൽ നമ്മുടെ ചുണ്ടിലും ഒരു ചിരി വരും. ഞാൻ ചിരിച്ചുകൊണ്ട് നിക്കുന്നത് കണ്ട് അമ്മ ചോദിച്ചു. ” എന്താടാ ഇഷ്ടായോ ”

ഞാൻ : “ഫോട്ടോയിൽ കൊള്ളാം പക്ഷെ അത് മാത്രം മതിയോ. തമ്മിൽ കണ്ട് സംസാരിച്ചു നോക്കണ്ടേ. പരസ്പരം ഒന്ന് അറിയാതെ എങ്ങനെയാ ”

അച്ഛൻ : ” അതെ അങ്ങനെ മതി. ഫോട്ടോ ഇഷ്ടം ആയെങ്കിൽ നമുക്ക് ഒന്ന് പെണ്ണ് കാണാൻ ചെന്നാലോ. പിന്നെ സാമ്പത്തികം ആയി വളരെ വലിയ ആൾകാർ ഒന്നുമല്ല അവർ. പെണ്ണിന് ഒരു ചേച്ചി ഉണ്ട് അതിന്റെ കല്യാണം കഴിഞ്ഞു ഇനി ഈ കുട്ടി കൂടിയേ ഒള്ളൂ. അതുപോട്ടെ പെൺകുട്ടി ബികോം കഴിഞ്ഞു നിക്കുവാ ജോലി വേണമെങ്കിൽ കിട്ടുമല്ലോ ”

ഞാൻ : ” അച്ഛാ സ്വാതിമോളെ പഠിത്തം കുറച്ചെങ്കിലും കഴിഞ്ഞിട്ട് പോരെ ”

അച്ഛൻ : ” ഹാ നീ അത് വിട്. എന്റെ കാലശേഷം നീ അവളെ പഠിപ്പിച്ചോ. ഞാനുള്ളത്രെയും കാലം ഞാൻ നോക്കിക്കോളാം. അതിനി ഏതു വരെ ആണെങ്കിലും ”

അമ്മ : ” ഒന്ന് പോയി നോക്കാമെടാ ”

ഞാൻ : ” ശെരിയാ ഒന്ന് പോയി നോക്കിയേക്കാം ”

ഞങ്ങൾ സംസാരിക്കുന്നത് ഒക്കെ ഒളിഞ്ഞു നിന്ന് കേൾക്കുകയാണ് സ്വാതി. ഞാൻ തിരിച്ചു റൂമിൽ കേറിയതും അവൾ നേരത്തെ പോലെ തന്നെ വന്ന് എന്റെ അടുത്ത് ഇരുന്നു.

സ്വാതി : ” എവിടെ നോക്കട്ടെ എന്റെ ഏട്ടത്തിയെ ” അവൾ എന്റെ കയ്യിലിരുന്ന ഫോട്ടോ പിടിച്ചു വാങ്ങി നോക്കി. ” ആഹാ സുന്ദരി ആണല്ലോ ”

ഞാൻ : ” ഹ്മ്മ് സോപ്പ് കൂടുതൽ പതപ്പിക്കണ്ട സിനിമയ്ക്ക് കൊണ്ട്പൊക്കോളാം ”

സ്വാതി എന്നേ നോക്കി ഒരു ചമ്മിയ ചിരി പാസ്സാക്കി.

സ്വാതി : ” അവിടെ നിന്ന് പറയുന്നത് ഞാൻ കേട്ടു എന്റെ പഠിത്തം നോക്കണ്ടേ എന്ന്. ഹോ എന്താ അനിയത്തിയോട് സ്നേഹം ”

ഞാൻ : ” എന്താടി സ്നേഹം ഇല്ലേ. നീ പറഞ്ഞത് എന്തെങ്കിലും സാധിച്ചു തരാതെ ഇരുന്നിട്ടുണ്ടോ”

സ്വാതി : ” എന്നാലേ എനിക്ക് അടുത്ത മാസം പതിനെട്ടു വയസാകും. ലൈസൻസ് എടുത്താൽ എനിക്ക് സ്കൂട്ടി വാങ്ങി തരുവോ”

ഞാൻ : ” എടി നിനക്ക് അതിന്റെ ആവശ്യം എന്താ. എവിടെ ആണെങ്കിലും അച്ഛൻ കൊണ്ടുപോയി വീടുവല്ലോ. തിരിച്ചു വിളിക്കാനും വരും. ആവശ്യം ഉള്ള കാര്യങ്ങൾ ചോദിക്ക് ”

സ്വാതി : ” ആണോ എന്നാൽ ചേട്ടന് പതിനെട്ടു വയസ്സിൽ തന്നെ അച്ഛൻ ബൈക്ക് മേടിച്ചു തന്നല്ലോ ”

ഞാൻ : ” എടി ഞാൻ ആണല്ലെ നീ അങ്ങനെ ആണോ ” പറയുമ്പോൾ എന്റെ തൊണ്ട വിക്കിപ്പോയി. അങ്ങനെ പറയാമോ?.

സ്വാതി : ” പെണ്ണുങ്ങൾക്ക് ഇതൊന്നും പാടില്ലേ. സ്വന്തമായിട്ട് വണ്ടി ഉള്ളത്കൊണ്ട് ചേട്ടന് എങ്ങോട്ട് വേണോങ്കിലും പോകാം. എനിക്ക് അച്ഛനെയോ ചേട്ടനെയോ പറഞ്ഞു സമ്മതിപ്പിക്കണം ”

ശെരിയാണ് ഞാൻ ആ കാലത്തൊക്കെ എന്തോരം കറങ്ങി നടന്നു. ബൈക്കിൽ എങ്ങോട്ട് വേണോങ്കിലും പോകാം. അച്ഛന്റെ അനുവാദം ഒന്നും വേണ്ട. ഇവൾക്കോ അച്ഛന്റെ അനുവാദം വേണം, അച്ഛനോ എനിക്കോ കൊണ്ടുപോയി വിടാൻ സമയം വേണം ഇല്ലെങ്കിൽ ബസിൽ പോകണം. ഒരേ വീട്ടിൽ ഒരേ സാമ്പത്തിക പരിസ്ഥിതിയിൽ വളരുന്ന രണ്ട് കുട്ടികൾക്ക് ഉള്ള അന്തരം നോക്കു.

ഞാൻ : ” ഹ്മ്മ് നോക്കട്ടെ പൈസ ഒത്തുവന്നാൽ വാങ്ങി തരാം ”

വിശ്വസിക്കാൻ പറ്റാതെ സ്വാതി എന്നേ നോക്കി. സ്വാതി എന്നെ കെട്ടിപ്പിടിച്ചു കവിളിൽ ഒരുമ്മ തന്നു

സ്വാതി : ” ഞാൻ ചുമ്മാ പറഞ്ഞയാ. എനിക്ക് സ്കൂട്ടി ഒന്നും വേണ്ട. അതിന് വേണ്ടി പൈസ കളയണ്ട. ”

ഞാൻ : ” ഇപ്പൊ എന്താ മനം മാറ്റം ”

സ്വാതി : ” വേണ്ട ഏട്ടാ എന്തിനാ പുതിയ വണ്ടി ഒക്കെ വാങ്ങുന്നെ ഞാൻ ചുമ്മാ പറഞ്ഞതാ ”

ഞാൻ : ” ഒരെണ്ണം വാങ്ങാമെന്നെ എന്തെങ്കിലും അത്യാവശ്യം വന്നാൽ നിനക്കും അമ്മയ്ക്കും കൂടി പോകാമല്ലോ. ”

സ്വാതി : ” ഇപ്പൊ തന്നെ ഇവിടെ രണ്ട് ബൈക്ക് ഇല്ലേ. ഇനി ചേട്ടൻ സ്കൂട്ടി വാങ്ങി പൈസ കളയണ്ട. ഒരു കാർ വാങ്ങ് പൈസ ഒത്തുവരുമ്പോ, അപ്പോൾ നമുക്ക് എല്ലാർക്കും കൂടി പോകാമല്ലോ. ഇപ്പോ ഞാൻ ചേട്ടന്റെ കൂടെ അമ്മ അച്ഛന്റെ കൂടെ രണ്ടായിട്ട് പോകണ്ടല്ലോ ”

ഞാൻ : ” ഹഹഹ അതൊക്കെ പയ്യെ വാങ്ങാം. അപ്പോ നിനക്ക് കറങ്ങി നടക്കാൻ വണ്ടി വേണ്ടെ ”

സ്വാതി : ” ഐഡിയ!! എന്നേ ബൈക്ക് പഠിപ്പിക്ക് ഞാൻ അച്ഛന്റെ ബൈക്ക് എടുത്തോളാം ”

ഞാൻ : ” അമ്പടി കേമി. നിന്നെ ഉണ്ടല്ലോ ” ഞാൻ അവളെ കട്ടിലിൽ തള്ളിയിട്ടു. അവൾ തലയിണ കൊണ്ട് എന്നേ അടിക്കാൻ തുടങ്ങി. എന്റെ പുറത്ത് രണ്ട് അടി തന്നിട്ട് അവൾ തലയിണ മാറ്റിയിട്ടു. എന്നിട്ട് വീണ്ടും ആ പെൺകുട്ടിയുടെ ഫോട്ടോ എടുത്ത് നോക്കി.

സ്വാതി : ” അതെ ഞാൻ നേരത്തെ സോപ്പ് ഇടാൻ പറഞ്ഞതല്ല ശെരിക്കും സുന്ദരി ആണ് കേട്ടോ. ഈ ചേച്ചി മതി ഏട്ടത്തി ആയിട്ട് ”

ഞാൻ ആ ഫോട്ടോ നോക്കി. നല്ല സുന്ദരി പെണ്ണ്. സത്യം പറയാല്ലോ അവളെ പോലൊരു ഭാര്യ ആരും കൊതിക്കും. ഞാൻ കുറെ നേരം ആ ഫോട്ടോയിലേക്ക് നോക്കിയിരുന്നു. എന്റെ മനസ്സിലേക്ക് പ്രണയം വരുന്നുണ്ടോ? ശേ ഞാൻ എന്താ ഇങ്ങനെ അവളുടെ ഫോട്ടോ കണ്ടപ്പോളേ ഇങ്ങനെ അയ്യേ. ഞാൻ സ്വയം നാണം കൊണ്ട് പുഞ്ചിരിച്ചു. ഞാൻ ആ ഫോട്ടോയുടെ മറുവശത്തു അവളുടെ പേര് എഴുതിയത് വായിച്ചു. “നയന ” നല്ല പേര്.....
അങ്ങനെ പെണ്ണ് കാണാൻ പോകേണ്ട ദിവസം എത്തി. രാവിലെ തന്നെ ഞാനും അച്ഛനും അമ്മയും സ്വാതിയും കൂടി അയൽവക്കത്തെ സതീഷിന്റെ കാറിൽ അങ്ങോട്ടേക്ക് തിരിച്ചു. ഞങ്ങൾ എന്ത് ആവശ്യത്തിനും വിളിക്കുന്ന ആളാണ് സതീഷേട്ടൻ. ഞങ്ങളുടെ കുടുംബവും ആയി നല്ല അടുപ്പം ഉണ്ട് അവരുടെ കുടുംബത്തിന്. സാധാരണ ചെറുക്കന്റെ അനിയത്തി ഒന്നും പെണ്ണ് കാണാൻ വരാറില്ലല്ലോ പക്ഷെ സ്വാതിക്കും നയനയെ കാണണം എന്ന് പറഞ്ഞു വാശി പിടിച്ചപ്പോൾ അവളെയും കൂടെ കൂട്ടി.

ഇതിനിടയിൽ ബ്രോക്കർ വഴി എന്റെ ഒരു ഫോട്ടോ നയനയ്ക്കും കൊടുത്തിരുന്നു. അതല്ലാതെ ഞാൻ അവളോട്‌ ഒരു whatsapp chat പോലും നടത്തി പരിചയപ്പെട്ടിട്ടില്ല.

ശെരിക്കും ഈ പെണ്ണുകാണൽ ഒരു ബോർ പരിപാടി ആണെന്ന് എനിക്ക് തോന്നാതിരുന്നില്ല. എന്തിനാ അല്ലെ ഈ പ്രഹസനം. പെൺകുട്ടിയും ആൺകുട്ടിയും തമ്മിൽ പരിചയപ്പെടണം കുറെ നാൾ സംസാരിക്കണം എന്നിട്ട് ഇഷ്ടപെട്ടാൽ കെട്ടണം ഇല്ലെങ്കിൽ വിട്ടുകളയണം. ഇത് പെണ്ണ് അണിഞ്ഞൊരുങ്ങി പ്രദർശന വസ്തുവിനെ പോലെ വന്ന് ചെക്കന്റെ വീട്ടുകാർക്ക് ചായ കൊടുക്കുന്നു കോപ്പിലെ ഏർപ്പാട് തന്നെ. അല്ല ഞാനും ഇപ്പൊ ഇത് തന്നെ അല്ലെ ചെയ്യുന്നേ അയ്യേ എനിക്ക് ആകെ ലജ്ജ തോന്നി.

അങ്ങനെ ഒരു 10 മണിയ്ക്ക് ഞങ്ങൾ അവിടെ എത്തി. നയനയുടെ അച്ഛൻ പുറത്തേക്ക് ഇറങ്ങി വന്ന് ഞങ്ങളെ സ്വീകരിച്ചു. ” വഴി തെറ്റിയില്ലല്ലോ അല്ലെ ” അദ്ദേഹം ചോദിച്ചു. Best...പെണ്ണുകാണലിന്റെ സ്ഥിരം ക്ളീഷേ ചോദ്യം ഇവർക്ക് ഇതൊക്കെ ഒന്ന് മാറ്റിപിടിച്ചു കൂടെ.

എന്തായാലും പുള്ളി ഞങ്ങളെ അകത്തേയ്ക്ക് ക്ഷണിച്ചു. ഞങ്ങൾ അകത്തു സോഫയിൽ ഒക്കെ ഇരുന്നു. അച്ഛനും നയനയുടെ അച്ഛനും കൂടി എന്തൊക്കെയോ നാട്ടുകാര്യം സംസാരിച്ചു.

” എന്നാൽ പിന്നെ അവളെ വിളിക്കാം അല്ലെ ” നയനയുടെ അച്ഛൻ അവളുടെ അമ്മയെ നോക്കി പറഞ്ഞു. അതോടെ അവളുടെ അമ്മ അകത്തേക്ക് പോയി. ഞാൻ സത്യം പറഞ്ഞാൽ അവളെ ഒന്ന് നേരിട്ടു കാണാൻ കൊതിച്ച് ഇരിക്കുകയാണ്. അവളുടെ ഫോട്ടോ കിട്ടിയപ്പോൾ മുതൽ എന്താ പറയുക അവളോട് പ്രണയം ഉള്ളത് പോലെ.

അവളുടെ വരവും കാത്ത് ഇരുന്നപ്പോൾ ആണ് സ്വാതി എന്റെ തോളിൽ കൈമുട്ട് കൊണ്ട് തട്ടിയത്. ഞാൻ എന്താ എന്നൊരു നോട്ടം അവളെ നോക്കിയപ്പോൾ ധാ നോക്ക് എന്ന് അവൾ മുഖം കൊണ്ട് കാണിച്ചു. ഞാൻ നോക്കുമ്പോ അടുക്കളയുടെ ഭാഗത്ത്‌ നിന്ന് ഒരു ട്രേയിൽ ചായയുമായി അവൾ വരുന്നു.

ഒരു നീല സാരിയും വെള്ളി നിറത്തിലെ ബ്ലൗസും അണിഞ്ഞു സുന്ദരി ആയി നയന. മുഖം കുനിച്ചാണ് അവളുടെ നടപ്പ്. മെലിഞ്ഞ നല്ല ഉയരം ഉണ്ട് ഇവൾക്ക്. ഫോട്ടോയിൽ കണ്ടപ്പോ ഞാൻ ഇത്രയും ഉയരം പ്രതീക്ഷിച്ചില്ല. ഇതിപ്പോ എന്നെക്കാൾ രണ്ടിഞ്ചു മാത്രമേ കുറവ് വരൂ. അവളെ ഞാൻ കൂടുതൽ ചൂഴ്ന്ന് നോക്കാൻ നിന്നില്ല അച്ഛനും അമ്മയും ഒക്കെ ഇരിക്കുക അല്ലെ.

അവൾ മന്ദം മന്ദം നടന്ന് എന്റെ മുന്നിൽ വന്ന് കുനിഞ്ഞു. ഞാൻ അവളുടെ മാറിടത്തിലേക്ക് മനഃപൂർവം നോക്കിയില്ല. മുഖത്തേക് നോക്കി.അവൾ ഒരു നിമിഷം എന്നെ ഒന്ന് നോക്കി.ഞങ്ങളുടെ കണ്ണുകൾ തമ്മിൽ ഉടക്കി. ചെറിയ പുഞ്ചിരി ഉണ്ട് ചുണ്ടിൽ. വലിയ മേക്കപ്പ് ഒന്നും ഇല്ല. ഞാനും ഒന്ന് ചിരിച്ചു. പെട്ടെന്ന് തന്നെ സംയമനം വീണ്ടെടുത്ത അവൾ അടുത്തിരുന്ന സ്വാതിയ്ക്ക് ചായ കൊടുത്തു. സ്വാതി പല്ലെല്ലാം പുറത്തു കാട്ടി ഒരടിപൊളി കോൾഗേറ്റ് ചിരിയോടെ ചായ വാങ്ങി. പിന്നീട് അവൾ എല്ലാവർക്കും ചായ കൊടുത്തു. എന്നിട്ട് ട്രേയും കയ്യിൽ പിടിച്ച് ഒരു മൂലയിൽ അവളുടെ അമ്മയുടെ അടുത്ത് നിന്നു. എന്നേ തന്നെയാണ് അവൾ നോക്കുന്നത് അവൾ എന്നെ നോക്കി ചിരിക്കുന്നും ഉണ്ട്.

പുല്ല് സാധാരണ പറയാറുള്ള “ഇനി കുട്ടികൾക്ക് എന്തെങ്കിലും സംസാരിക്കാൻ ഉണ്ടെങ്കിൽ സംസാരിക്കട്ടെ” എന്ന ക്ളീഷേ ചോദ്യം ആരും പറയുന്നില്ലല്ലോ. ഞാൻ അതിന് വേണ്ടി കാത്തിരിക്കുകയാണ്. ഒടുവിൽ എന്റെ കാത്തിരിപ്പിനു വിരാമം ഇട്ടുകൊണ്ട് അവളുടെ അച്ഛൻ അത് പറയാൻ തുടങ്ങി.

നയന : ” അച്ഛാ ഒരു മിനിറ്റ് ” അവളുടെ അച്ഛനെ തടഞ്ഞുകൊണ്ട് അവൾ പറഞ്ഞു. എല്ലാവരും ഒന്ന് ഞെട്ടി. ഈ മിണ്ടാപ്പൂച്ച പോലത്തെ പെണ്ണ് അവിടെ വച്ചു അങ്ങനെ അവളുടെ അച്ഛനെ തടഞ്ഞു സംസാരിക്കും എന്ന് ആരും കരുതിയില്ല. എല്ലാവരും അത്ഭുതത്തോടെ അവളെ നോക്കി.

നയന : ” അച്ഛാ ഒറ്റയ്ക്ക് സംസാരിക്കുന്നതിന് മുൻപ് അദ്ദേഹത്തിന്റെ കുടുംബം കൂടി കേൾക്കേണ്ട ചില കാര്യങ്ങൾ എനിക്ക് പറയാൻ ഉണ്ട്. അത് ഇപ്പോൾ പറയാം”

വളരെ ഭവ്യതയോടെയും വിനയത്തോടെയും ആണ് അവളുടെ സംസാരം. അത് അവളുടെ സ്മാർട്നെസ്സ് ആയിട്ട് എല്ലാർക്കും തോന്നി. അവളുടെ അച്ഛൻ അന്തം വിട്ട് ഇരുന്നപ്പോൾ എന്റെ അച്ഛന് അവളുടെ പെരുമാറ്റം ശെരിക്കും ഇഷ്ടപ്പെട്ടു

“പറഞ്ഞോ മോളെ ” എന്റെ അച്ഛൻ പറഞ്ഞു.
സത്യത്തിൽ അവൾ എന്താണ് പറയാൻ പോകുന്നത് എന്നറിയാൻ എല്ലാവർക്കും ആകാംഷ ആയി.

നയന : ” ഞാൻ bcom കഴിഞ്ഞ് നിക്കുവാ. എനിക്ക് പക്ഷേ കൂടുതൽ പഠിക്കാൻ താല്പര്യം ഉണ്ട്. കല്യാണം കഴിഞ്ഞാലും അത് തുടരണം എന്നാണ് എന്റെ ആഗ്രഹം അപ്പോ അത് ഒരു ബുദ്ധിമുട്ട് ആകുമോ നിങ്ങൾക്ക്? പണത്തിന്റെ കാര്യത്തിൽ ഭർത്താവിനെ ആശ്രയിക്കാതെ സ്വയം പര്യാപ്തത ഉള്ള ഒരു സ്ത്രീ ആവാൻ ആണ് എനിക്ക് താല്പര്യം. അതിന് നല്ല ജോലി വേണം അതിന് ഇനിയും പഠിക്കണം. എന്റെ പഠനം ഒരു പ്രശ്നം ആകുമോ? ”

പ്രധാനമായും എന്റെ അമ്മയെ നോക്കി ആണ് അവൾ പറഞ്ഞത്. മരുമകൾ പഠിക്കാൻ പോയാൽ അമ്മായിയമ്മ പ്രശ്നം ഉണ്ടാക്കുമോ എന്നതാണ് അവളുടെ ആശങ്ക. അവളുടെ അച്ഛൻ അവളെ രൂക്ഷമായി ഒന്ന് നോക്കി.

ഞാൻ : ” അത് ഒരു പ്രശ്നം അല്ല. കല്യാണം കഴിഞ്ഞാലും നയനയ്ക്ക് പഠിക്കാം. മാത്രമല്ല എന്റെ ഭാര്യ ആയിക്കഴിഞ്ഞാൽ നയനയുടെ പഠിത്തം ചെലവ് ഒക്കെ ഞാൻ നോക്കും. ഭാര്യയേ പഠിപ്പിക്കാൻ അവളുടെ അച്ഛന്റെ കയ്യിൽ നിന്ന് പൈസ മേടിക്കാൻ മാത്രം ദുഷ്ടൻ അല്ല ഞാൻ. ”

എന്റെ മറുപടി നയനയ്ക്കും അതുപോലെ മറ്റുള്ളവർക്കും ഇഷ്ടപെട്ടത് പോലെ തോന്നി. അപ്പോൾ നയന അടുത്ത ആവശ്യം മുന്നോട്ട് വച്ചു.

നയന : ” പിന്നെ ഭർത്താവിന്റെ വീട്ടിൽ അടുക്കളയിൽ ഒതുങ്ങി കൂടി ജീവിതം മുഴുവൻ പാചകം ചെയ്യാൻ എനിക്ക് താല്പര്യം ഇല്ല. ഭർത്താവിന് വേണ്ടി ഭക്ഷണം ഉണ്ടാക്കി കൊടുക്കാൻ മാത്രം ആണ് ഭാര്യ എന്നാണ് ചിലരുടെ വിചാരം. ഞാൻ അതിന് തയ്യാർ അല്ല. ഭർത്താവിനും പാചകം ചെയ്യാവുന്നതേ ഉള്ളു. ”

വളരെ വിനയത്തോടെ ആണ് അവളുടെ സംസാരം എങ്കിലും ഇത് എല്ലാവരെയും ഞെട്ടിച്ചു. അവളുടെ അച്ഛന്റെ മുഖത്ത് എല്ലാം തീർന്നു എന്നൊരു ഭാവം ആണ്. അവളുടെ അമ്മ ആകട്ടെ അന്തം വിട്ട് നിൽക്കുന്നു. ഞാനും ഒന്ന് ഞെട്ടി. എങ്കിലും സംയമനം വീണ്ടെടുത്ത് ഞാൻ ചോദിച്ചു.

 
ഞാൻ : ” അതായത് എനിക്ക് കഴിക്കേണ്ട ഭക്ഷണം ഞാൻ ഉണ്ടാക്കണം നയന എനിക്ക് വേണ്ടി ചെയ്യില്ല എന്നാണോ ”

നയന : ” അതെ. എന്തിനാണ് ചെയ്യുന്നത്. താങ്കൾക്ക് വേണ്ടത് താങ്കൾക്ക് സ്വയം ഉണ്ടാക്കികൂടെ ”

ഞാൻ : ” ശെരി ഒരു കാര്യം ചോദിക്കട്ടെ നയനയ്ക്ക് വേണ്ട ഭക്ഷണം സ്വയം ഉണ്ടാക്കിക്കോളുമോ ”

നയന : ” അത് ചെയ്തോളാം ”

ഞാൻ : ” എന്നാൽ എനിക്കും കുറച്ചു ഡിമാൻഡ്സ് ഉണ്ട് ”

എല്ലാവരും എന്നെ നോക്കി.

ഞാൻ : ” നയനയ്ക്ക് വേണ്ട ഒരു കാര്യവും ഞാനും ചെയ്യില്ല. എല്ലാം സ്വയം ചെയ്യണം. നയനക്ക് പഠിക്കണമെങ്കിൽ നയന സ്വയം പണം കണ്ടെത്തുക. പിന്നെ സ്വയം ഭക്ഷണം ഉണ്ടാക്കും എന്ന് പറഞ്ഞല്ലോ അതിന് വേണ്ട സാമഗ്രികൾ ഒന്നും എന്റെ വീട്ടിൽ നിന്ന് തരില്ല. പലചരക്കും പച്ചക്കറിയും എല്ലാം നയന തന്നെ വാങ്ങുക. നയനയ്ക്ക് ഉപയോഗിക്കേണ്ട പാത്രങ്ങളും സ്വന്തമായി കൊണ്ടുവരണം. പിന്നെ കല്യാണം കഴിഞ്ഞ് എന്റെ വീട്ടിൽ ആയിരിക്കുമല്ലോ നയന താമസിക്കുന്നത് അതിന്റെ വാടക നയന എന്റെ അച്ഛന് കൊടുക്കണം. അതുപോലെ വാടക വീട്ടിൽ ആവശ്യം ഉള്ള സാധനങ്ങൾ കൊണ്ട് പോകുന്നത് പോലെ നയനയ്ക്ക് ആവശ്യം ഉള്ള സാധനം എല്ലാം നയന കൊണ്ടുവരണം കട്ടിൽ അടക്കം എല്ലാം. പിന്നെ കറന്റ്‌ ബില്ലിന്റെ ഒരു പങ്ക് നയന അടയ്ക്കണം അതുപോലെ ഉപയോഗിക്കുന്ന വെള്ളത്തിനും. നയനയ്ക്ക് ഉപയോഗിക്കാൻ വാഹനം വേണമെങ്കിൽ നയന കൊണ്ട് വരണം. നയനയ്ക്ക് ടിവി, കമ്പ്യൂട്ടർ ഒക്കെ ഉപയോഗിക്കണം എങ്കിൽ അതെല്ലാം നയന കൊണ്ട് വരണം. അതുപോലെ ഉപയോഗിക്കുന്ന എല്ലാ കാര്യവും സ്വയം കണ്ടെത്തണം. ”

എന്റെ പറച്ചിൽ കേട്ട് എല്ലാരും അന്തം വിട്ടു. അവളുടെ അമ്മ എന്താ നടന്നത് എന്ന് മനസിലാകാതെ നിക്കുന്നു. അവളുടെ അച്ഛൻ എല്ലാം കുളമായി എന്ന് മനസിലായി. സ്വാതി ആകട്ടെ ചിരി അടക്കിപ്പിടിച്ചു ഇരിക്കുകയാണ്. എന്റെ അച്ഛൻ ഒരു വികാരവും ഇല്ലാതെ അവൾ എന്താ മറുപടി പറയുക എന്ന് നോക്കി ഇരിക്കുന്നു. ഞാൻ ഒന്ന് നേരെ ഇരുന്ന് അവളുടെ മുഖത്ത് നോക്കി വീണ്ടും പറഞ്ഞു

ഞാൻ : ” പറഞ്ഞത് മനസ്സിലായോ. ഇതൊക്കെ ഞാൻ എന്തിന് നിനക്ക് തരണം എല്ലാം നയനയ്ക്ക് സ്വന്തമായി ചെയ്ത് ഉണ്ടാക്കികൂടെ “. അവളുടെ ഡയലോഗ് തന്നെ ഞാൻ അങ്ങോട്ട്‌ അടിച്ചു.

നയന ഞെട്ടി പണ്ടാരം അടങ്ങിപ്പോയി. അവൾക്ക് എന്താ പറയേണ്ടത് എന്ന് നിശ്ചയം ഇല്ല. അവൾ ആകെ ചമ്മി അവിടെ നിന്നു. ഇനിയിപ്പോ കൂടുതൽ ഇരിക്കേണ്ട ഇറങ്ങി പോകാം എന്ന് ഞാൻ തീരുമാനിച്ചു. പക്ഷേ എന്റെ അനിയത്തി സ്വാതി വളരെ തന്മയത്തത്തോടെ പ്രവർത്തിച്ചു.

സ്വാതി : ” ഈ ചേട്ടൻ ഇങ്ങനെയാ. ചേച്ചി പേടിക്കണ്ട. ഒറ്റയ്ക്ക് സംസാരിക്കേണ്ട കാര്യങ്ങൾ അല്ലെ. പോ രണ്ടാളും ഒറ്റയ്ക്ക് സംസാരിക്ക് ” അവൾ എന്നെ പിടിച് ഉന്തി.

പ്രായത്തിൽ കവിഞ്ഞ പക്വത കാണിച്ചു സ്വാതി അങ്ങനെ പറഞ്ഞപ്പോൾ എല്ലാരും അത് സമ്മതിച്ചു കാരണം പൊട്ടാൻ പോയ ഒരു അഗ്നിപർവതം ആണ് അവൾ വെള്ളം ഒഴിച്ചു കെടുത്തിയത്. സാധാരണ ഗതിയിൽ ഇത്രയും ആയാൽ ഏത് വീട്ടുകാരും ഇറങ്ങി പോകും എന്നാൽ എന്തോ ഞാൻ അവളോട്‌ ഒറ്റയ്ക്ക് സംസാരിക്കാൻ തീരുമാനിച്ചു.

ഞങ്ങൾ ഒന്നും മിണ്ടാതെ ഒരു മുറിയിലേക്ക് കയറി. അവളുടെ മുറി ആയിരിക്കും അത്. എല്ലാ സാധനങ്ങളും വൃത്തിക്ക് അടുക്കി പെറുക്കി വച്ചിട്ടുണ്ട്. മേശയിൽ ഇരിക്കുന്ന ഒരു പുസ്തകം ഞാൻ എടുത്ത് മറിച്ചു നോക്കി. KR മീരയുടെ ആരാച്ചാർ എന്ന പുസ്തകം ആയിരുന്നു അത്. അവൾ അപ്പോളും എങ്ങനെ തുടങ്ങണം എന്ന് അറിയാതെ മിണ്ടാതെ നിക്കുകയാണ്. നേരത്തെ ഞാൻ പറഞ്ഞ കാര്യങ്ങൾ അവൾക്ക് ഒരു തിരിച്ചടി ആയിരുന്നല്ലോ. ഞാനാകട്ടെ ആ കാര്യങ്ങൾ മറക്കാൻ നോക്കി കാരണം ഇവളോട് എന്തോ ഒരു സ്നേഹം തോന്നുന്നു. ഒന്നും സംഭവിക്കാത്ത മട്ടിൽ ഞാൻ അവളെ നോക്കി പുഞ്ചിരിച്ചു.

ഞാൻ : ” വലിയ ഫെമിനിസ്റ്റ് ആണല്ലെ ”

നയന ആകെ ചമ്മി. അവൾ കളിയാക്കിയതാണോ എന്ന് വിചാരിച്ചു മിണ്ടാതെ നിന്നു.

ഞാൻ : ” കളിയാക്കിയത് ഒന്നും അല്ല. അവിടെ എന്റെ അടുത്ത് ഇരുന്ന എന്റെ അനിയത്തി ഇല്ലേ അവളും തന്നെപോലെയാ. ഫെമിനിസ്റ്റ് ആ ”

അതോടെ ഞങ്ങളുടെ ഇടയിലെ മഞ്ഞുരുകി.

നയന : ” അപ്പോ നിങ്ങളോ ”

ഞാൻ : ” ഞാൻ അതിനെക്കുറിച് കൂടുതൽ ചിന്തിക്കാറില്ല. എന്റെ അനിയത്തിക്കും അമ്മയ്ക്കും വേണ്ടതൊക്കെ ചെയ്ത് കൊടുക്കും. അവരുടെ സന്തോഷം എന്റെ സന്തോഷം ”

നയന : ” ഭർത്താവ് പാചകം ചെയ്യണം എന്ന് ഞാൻ പറഞ്ഞത് തെറ്റാണോ ”

ഞാൻ : ” ഒരിക്കലും അല്ല നയന. അടുക്കള പണി സ്ത്രീ ഒറ്റയ്ക്ക് ചെയ്യണം എന്ന് എനിക്ക് അഭിപ്രായം ഇല്ല. പക്ഷേ നയന എനിക്ക് വേണ്ടി ഒരിക്കലും പാചകം ചെയ്യില്ല എന്ന് പറയുന്നത് ശെരിയല്ല. ആ പണി ഷെയർ ചെയ്ത് രണ്ടാളും കൂടി ചെയ്യണം എന്ന് നയന പറഞ്ഞാൽ ഞാൻ അംഗീകരിക്കും. അല്ലാതെ ഭർത്താവിന് വേണ്ടി ഒരിക്കലും പാചകം ചെയ്യില്ല എന്നൊക്കെ പറഞ്ഞാൽ എങ്ങനെയാ. പല കാര്യങ്ങളും അങ്ങോട്ടും ഇങ്ങോട്ടും ചെയ്ത് കൊടുക്കുന്നതാണ് ദാമ്പത്യം. ഭാര്യ ഭർത്താവിന് ഭക്ഷണം ഉണ്ടാക്കുന്നത് അവളുടെ ബാധ്യത അല്ല അതൊരു സ്നേഹം ആണ്. അതുപോലെ ഭാര്യയ്ക്ക് നല്ല ഭക്ഷണം വസ്ത്രം ഒക്കെ ഭർത്താവ് കൊടുക്കുന്നതും സ്നേഹം ഉള്ളത് കൊണ്ടാണ്. ദാമ്പത്യത്തിൽ എന്റെ എന്നൊന്നില്ല എല്ലാം നമ്മളുടേത് എന്നാണ് ചിന്തിക്കേണ്ടത്. നയന സംസാരിച്ചത് ഒരു കോൺട്രാക്ട് ഒപ്പിടുമ്പോൾ നിബന്ധന വയ്ക്കുന്നത് പോലെയാണ്. എന്നാൽ വിവാഹം കോൺട്രാക്ററ് അല്ലെന്ന് തിരിച്ചറിയണം ”

നയന : ” ഞാൻ അത്രയ്ക്കൊന്നും ആലോചിച്ചില്ലയിരുന്നു ”

ഞാൻ : ” നയന അവിടെ പറഞ്ഞത് നയനയുടെ സ്വന്തം വാക്കുകൾ അല്ല. ആരോ നയനയെ പഠിപ്പിച്ചു വിട്ടതല്ലേ ”

അവളുടെ മുഖം അത്ഭുതം കൊണ്ട് വെളുത്തു. അവൾ എന്നെ നോക്കി ഒരു നിമിഷം നിന്നു എന്നിട്ട് പറഞ്ഞു “അതെ”

ഞാൻ : ” ആരാ അതൊക്കെ പറയണം എന്ന് പറഞ്ഞത് ”

നയന : ” എന്റെ ചേച്ചി ആണ് അങ്ങനെ പറയാൻ പറഞ്ഞത് ”

ഞാൻ : ” ചേച്ചിയോ എന്തിന്? ”

നയന : ” ചേച്ചിയുടെ അവസ്ഥ ഇതാണ്. ചേച്ചിയുടെ ഭർത്താവിന്റെ അടിമയാണ് ചേച്ചി. രാവിലെ മുതൽ വീട്ടുജോലി. വൈകിട്ട് ചേട്ടൻ കള്ളും കുടിച് വരും. ചേച്ചിയ്ക്ക് ഒരു സുഖവും കൊടുക്കില്ല. ചേച്ചിക്ക് ജോലി ഇല്ലാത്തത് കൊണ്ട് സ്വന്തം ആയിട്ട് സമ്പാദ്യം ഇല്ല. നല്ലൊരു സാരി ഇല്ല. അച്ഛനോട് ചോദിക്കാൻ മടി ആണ് ചേച്ചിക്ക്. ചേച്ചിക്ക് ഒരു സ്വാതന്ത്ര്യം ഇല്ല. ശമ്പളം ഇല്ലാത്ത ഒരു വേലക്കാരി. ”

ഞാൻ : ” ഹ്മ്മ് ചേച്ചിക്ക് നയനയോട് സ്നേഹം ഉണ്ട്. അതുകൊണ്ട് ആണ് ചേച്ചി ഇങ്ങനെ പറയാൻ പറഞ്ഞത്. ഞാൻ ഒരു കാര്യം ഉറപ്പ് തരുന്നു. ചേച്ചിയുടെ അവസ്ഥ നയനയ്ക്ക് വരില്ല. ”

ശെരിക്കും എന്ത് കഷ്ടം ആണ് അടുക്കളയിൽ എരിഞ്ഞു തീരാൻ ആയി ഉള്ള ജീവിതങ്ങൾ. ഒരു ഭർത്താവിന്റെ കടമകൾ മറന്ന് സ്ത്രീകളെ ഇങ്ങനെ അടിമകൾ ആക്കി വയ്ക്കുന്നത് എന്തോ വലിയ ആണത്തം ആണെന്നാണ് ഇവരുടെ ഒക്കെ വിചാരം.

നയന : ” അതെ എനിക്ക് ഒന്ന് രണ്ട് കാര്യങ്ങൾ കൂടി അറിയാൻ ഉണ്ട് ”

ഞാൻ : ” എന്താ ”

നയന : ” ഇയാൾ കള്ള് കുടിക്കുമോ ”

ഞാൻ : ” ഇതുവരെ ഇല്ല ”

നയന : ” അപ്പൊ ഇനി ഉണ്ടാകും എന്നാണോ ”

ഞാൻ : ” ഹാ നിന്നെ കെട്ടിയാൽ ചിലപ്പോ കുടിച്ചു പോകും ” ഞാൻ ചിരിയോടെ പറഞ്ഞൂ.

നയന : ങേ എങ്ങനെ എങ്ങനെ. അപ്പൊ എന്നെ കെട്ടും എന്ന് അങ്ങ് തീരുമാനിച്ചോ ” അവൾ ചിരിച്ചു

ഞാൻ : ” അങ്ങനെ ആണ് ആഗ്രഹം ”

നയന : ” നമുക്ക് ഒന്ന് നന്നായി പരിചയപ്പെടാം. കുറച്ച് നാളുകൾ എടുത്ത്. ഇയാളുടെ ഫോൺ നമ്പർ താ”

ഞാൻ : ” ശെരിയാ എല്ലാം അറിഞ്ഞു വേണം കല്യാണം കഴിക്കാൻ പിന്നീട് ദുഖിക്കേണ്ട. ഒരു കാര്യം ചോദിക്കട്ടെ ”

നയന : ” ചോദിക്ക് ”

ഞാൻ : ” നയനയ്ക്ക് എന്നെ ഇതുവരെ കണ്ടതും പെരുമാറിയതും വച്ച് ഇച്ചിരി എങ്കിലും ഇഷ്ടം ആയോ ”

നയന : ” എനിക്ക് ഇഷ്ടം ഒക്കെ ആയി. സൗന്ദര്യം എനിക്ക് പ്രശ്നം അല്ല സ്വഭാവം ആണ് മെയിൻ ”
അവൾ എന്നെ ഒന്ന് വാരി. ആ പറഞ്ഞതിന്റെ ഒരു അർത്ഥം എനിക്ക് വലിയ സൗന്ദര്യം ഇല്ലെന്ന് ആണല്ലോ.

ഞാൻ : ” എനിക്ക് സൗന്ദര്യം ആണ് വേണ്ടത് ബുദ്ധി ഇല്ലെങ്കിലും കുഴപ്പം ഇല്ല “. ഞാൻ അവളെ തിരിച്ചും വാരി.

നയന : ” ഓ നമിച്ചു. ഇയാളോട് പറഞ്ഞു ജയിക്കാൻ പറ്റില്ല”.

ഇപ്പോൾ അവൾ വളരെ ഫ്രണ്ട്‌ലി ആയി സംസാരിക്കാൻ തുടങ്ങി. ഞങ്ങളുടെ രണ്ട് മനസ്സും പതിയെ അടുക്കാൻ തുടങ്ങി. എനിക്ക് അവളുടെ ശരീരത്തോട് തോന്നിയ ഇഷ്ടം ഇപ്പൊ മനസ്സിനോടും തോന്നി തുടങ്ങി.

ഞാൻ : ” എന്റെ ഫോൺ നമ്പർ തരാം. വൈകിട്ട് വിളിക്കാം. ”

നയന : ” ശെരി ”

ഞാൻ അവൾക്ക് എന്റെ ഫോൺ നമ്പർ കൊടുത്തു. പിന്നെയും കുറച്ച് നേരം ഞങ്ങൾ സംസാരിച്ചിരുന്നു. കുറെ നേരത്തെ സംസാരത്തിൽ ഞങ്ങൾ വളരെ അടുത്തു. ഞാൻ ഒരു മര്യാദക്കാരൻ ആണെന്ന് അവൾക്ക് മനസിലായി. അവളും പുറമെ ഉള്ള പ്രകടനം മാത്രേ ഉള്ളു ഉള്ളിൽ പാവം ആണെന്ന് മനസിലായി. സംസാരിച്ചിരുന്ന ഞങ്ങൾ സമയം പോയത് അറിഞ്ഞില്ല. അവളുടെ അമ്മ വന്ന് വിളിച്ചപ്പോൾ ആണ് സമയം കുറെ ആയി എന്ന് മനസ്സിലായത്.

കീരിയും പാമ്പും പോലെ അകത്തേക്ക് കേറിപ്പോയ ഞങ്ങൾ അടയും ചക്കരയും ആയിട്ടാണ് തിരികെ വന്നത്. ചെറിയ പുഞ്ചിരിയോടെ പുറത്തേക്ക് വരുന്ന എന്നെ കണ്ടതും സ്വാതി ഒന്ന് ചൂഴ്ന്നു നോക്കി. കാര്യങ്ങൾ ഏകദേശം ഓക്കേ ആയെന്ന് മനസ്സിലായി. എന്റെ മുഖത്തെ പ്രസന്നത കണ്ട് നയനയുടെ അച്ഛനും ഒന്ന് സന്തോഷിച്ചു.

അടുത്തതായി ഊണ് കഴിക്കാൻ ഇരുന്നു. ഞങ്ങൾ എല്ലാവരും ഇരുന്നപ്പോൾ നയനയും അവളുടെ അമ്മയും കൂടെ ഞങ്ങൾക്ക് വിളമ്പി. അത് കണ്ടിട്ട് എന്റെ അമ്മയും അവരെ വിളമ്പാൻ സഹായിച്ചു. എല്ലായിടത്തും ഇങ്ങനെ ആണല്ലോ പെണ്ണുങ്ങൾ ആണുങ്ങൾക്ക് വിളമ്പി കൊടുത്തിട്ട് വേണം കഴിക്കാൻ എന്നൊരു അലിഖിത നിയമം ഉള്ളത് പോലെ.

നല്ല രുചിയുള്ള വിഭവങ്ങൾ ആയിരുന്നു. പ്രത്യേകിച്ച് മീൻകറി. അതാരാ ഉണ്ടാക്കിയത് എന്ന് എന്റെ അച്ഛൻ എടുത്തു ചോദിച്ചപ്പോൾ സന്തോഷത്തോടെ നയന പറഞ്ഞു അവളാണ് ഉണ്ടാക്കിയത് എന്ന്. അവളുടെ അമ്മയുടെ മുഖത്ത് അന്നേരം ഒരു ഗമ ഉണ്ടായിരുന്നു. കണ്ടോ എന്റെ മോൾടെ കൈപ്പുണ്യം എന്നായിരുന്നു അതിന്റെ അർത്ഥം.

ഞാൻ ഒന്നാലോചിച്ചു. മകളുടെ കൈപ്പുണ്യം കാണിച്ചു പയ്യന്റെ വീട്ടുകാരെ ഇമ്പ്രെസ്സ് ചെയ്യിക്കാൻ ആ അമ്മയുടെ വ്യഗ്രത. സത്യത്തിൽ വിവാഹ കമ്പോളത്തിൽ പെണ്ണിന് വേണ്ട ഒരു ഗുണം പോലെയാണ് കൈപ്പുണ്യം. കെട്ടാൻ പോകുന്നത് പെണ്ണിനെ അല്ലെ അല്ലാതെ പാചകക്കാരിയെ അല്ലല്ലോ. എന്റെ അഭിപ്രായത്തിൽ പെണ്ണിന് പഠിപ്പും വിവരവും ഉണ്ടോന്നാണ് ആദ്യം നോക്കേണ്ടത് അല്ലാതെ ഇതൊക്കെ അല്ല. സൗന്ദര്യം, കൈപ്പുണ്യം ഇതൊക്കെ അത്ര വലിയ കാര്യങ്ങൾ ആണോ.
സ്വാതി ഇതൊക്കെ ചിന്തിക്കുന്നുണ്ടാവും എന്ന് എനിക്ക് തോന്നി. നയനയെക്കാൾ ലോകവിവരം സ്വാതിക്ക് ഉണ്ട്. അവളും ഇത് ചിന്തിച്ചോ എന്നറിയാൻ ഞാൻ അവളെ നോക്കി. എവിടുന്ന് അവിടെ നടന്നതൊന്നും കേൾക്കാതെ ഭക്ഷണത്തിൽ മാത്രം ശ്രദ്ധ കൊടുത്ത് വെട്ടി വിഴുങ്ങുകയാണ് സ്വാതി.

നയന : ” മോൾക്ക് എല്ലാം ഇഷ്ടപ്പെട്ടു അല്ലെ. അല്ല മോൾടെ പേര് പറഞ്ഞില്ലല്ലോ “. നയന സ്വതിയോട് ചോദിച്ചു.

സ്വാതി : ” എന്റെ പേര് സ്വാതി. ഫുഡ്‌ അടിപൊളിയാ ചേച്ചി. ഇനി ചേച്ചി അവിടെ വന്നിട്ട് വേണം ഇതൊക്കെ നല്ലോണം കഴിക്കാൻ. ചേട്ടന് ഉണ്ടാക്കി കൊടുക്കേണ്ട പക്ഷെ എനിക്ക് ഉണ്ടാക്കി തരണം ”

അവൾ ഒരു കള്ളച്ചിരിയോടെ പറഞ്ഞപ്പോ എല്ലാരും ചിരിച്ചു പോയി. സത്യത്തിൽ രണ്ട് കുടുംബങ്ങളും തമ്മിൽ അതിലൂടെ ഒക്കെ അടുത്ത്കൊണ്ടിരിക്കുകയായിരുന്നു. കളിയും ചിരിയും കൊണ്ട് ആ തീന്മേശയിൽ ബഹളമായി. അങ്ങനെ ഭക്ഷണം ഒക്കെ കഴിച്ചു കുറച്ച് നേരം കൂടി സംസാരിച്ച ശേഷം ഞങ്ങൾ ഇറങ്ങി. ഞങ്ങൾ ഇറങ്ങാറായപ്പോൾ സതീശേട്ടൻ വീണ്ടും വന്നു ഞങ്ങളെ കൊണ്ടുപോകാൻ. ഇടയ്ക്ക് കിട്ടിയ ഗ്യാപ്പിൽ വേറൊരു ഓട്ടത്തിന് പോയതായിരുന്നു കക്ഷി. ഇറങ്ങാൻ നേരം ഞാൻ ഒന്നുകൂടി അവളെ തിരിഞ്ഞു നോക്കി. അവളും എന്നെ നോക്കി പുഞ്ചിരിച്ചു നിൽക്കുകയാണ്. എന്റെ മനസ്സ് നിറഞ്ഞു. ഇവൾ തന്നെ എന്റെ ഭാര്യ ഞാൻ മനസ്സിൽ ഉറപ്പിച്ചു.

വീട്ടിൽ വന്നിട്ട് ഞാൻ സ്വപ്നലോകത്ത് എത്തിയത് പോലെ ആയിരുന്നു. ഞാൻ പെട്ടെന്ന് അവളെ ഒന്ന് വിളിക്കാം എന്ന് കരുതി പക്ഷെ നമ്പർ വാങ്ങിയില്ല. എന്റെ നമ്പർ അങ്ങോട്ട് കൊടുത്തതെ ഉള്ളു. ശേ ഇനി അവൾ ഇങ്ങോട്ടു വിളിച്ചാൽ മാത്രമേ അവളോട്‌ സംസാരിക്കാൻ പറ്റു. ഞാൻ കുറെ കാത്തിരുന്നു പക്ഷേ എനിക്ക് കാൾ ഒന്നും വന്നില്ല. എന്റെ പെരുമാറ്റത്തിലെ വ്യത്യാസം എല്ലാം സ്വാതി കാണുന്നുണ്ട്. അവൾ എല്ലാം കണ്ടു ചിരിക്കുന്നുണ്ട്. ഞാൻ അതൊന്നും ശ്രദ്ധിക്കാൻ പോയില്ല.

സ്വാതി : ” എന്താണ് മോനെ ഒരു പരവേശം ”

ഞാൻ : ” ഹേയ് എന്ത് പരവേശം ഒന്നുമില്ല പോയെ നീ ”

സ്വാതി : ” ഞാൻ എല്ലാം കാണുന്നുണ്ട് ”

ഞാൻ : ” എന്ത് കണ്ടെന്നു ”

സ്വാതി : ” ആ ചേച്ചിയോട് റൂമിൽ ഒറ്റയ്ക്ക് സംസാരിച്ചു കഴിഞ്ഞപ്പോൾ മുതൽ കാണുന്നതാ ഒരു മാറ്റം. സ്വഭാത്തിൽ അല്പം പഞ്ചാര വന്ന പോലെ ഹിഹി ”

ഞാൻ : ” ദേ പെണ്ണെ എന്റെ കയ്യീന്ന് വാങ്ങുവെ. പോടീ അപ്പുറത്ത് ”

സ്വാതി : ” അയ്യടാ ഇങ് വാ തല്ലാൻ ഞാൻ നിന്ന് തരുവല്ലേ ”

ഞാൻ തമാശയ്ക്ക് അവളുടെ തലയിൽ ഒന്ന് കൊട്ടി. അവൾ ഉടനെ എന്നെ തള്ളി കട്ടിലിൽ ഇട്ട് എന്റെ മുതുകിൽ കേറി ഇരുന്ന് ചെണ്ട കൊട്ടാൻ തുടങ്ങി. പെണ്ണിന് ദേഷ്യം പിടിച്ചാൽ ഇതാണ് സ്ഥിരം പരിപാടി. ഞാൻ ആകട്ടെ അവളുടെ കുഞ്ഞി കയ്യ് കൊണ്ടുള്ള ഇടി ഒക്കെ ആസ്വദിച്ചു കിടന്നു. എനിക്ക് വേദനിക്കുന്നില്ല എന്ന് കണ്ടതും അവൾക്ക് വാശി ആയി.

അങ്ങനെ അനിയത്തിയുടെ കുസൃതിക്ക് കിടന്നപ്പോൾ ആണ് ഒരു പുതിയ നമ്പറിൽ നിന്നും ഒരു കാൾ വന്നത്. ബെഡിൽ കിടന്ന ഫോൺ എടുത്തു നോക്കിയ എനിക്ക് മനസ്സിലായി അത് നയന ആണെന്ന്. ഞാൻ പെട്ടെന്ന് ഞെട്ടിപിടഞ്ഞു ഫോൺ എടുത്തു. അപ്പോളാണ് പ്ധും എന്നൊരു ശബ്ദം കേട്ടത്. നോക്കുമ്പോൾ എന്റെ മുതുകിൽ കേറി ഇരുന്ന സ്വാതി ദാ കിടക്കുന്നു നിലത്ത്. അയ്യോ എന്ന് അവൾ കരഞ്ഞത് കേട്ടതും ഞാൻ അവളെ പരിഭ്രാന്തിയോടെ നോക്കി. എന്നാൽ വീണ്ടും വാശിയോടെ അവൾ എന്റെ മെത്തേക്ക് ചാടി “ഡാ ദുഷ്ട എന്നെ ഉരുട്ടി ഇട്ടല്ലേ” അവൾ അതുംപറഞ്ഞു എന്റെ മീശയിൽ പിടിച്ച് വലിച്ചു. ഞാൻ ഫോണിൽ കൂടി കാറി “ആാാാാ”.

നയന : ” ഹലോ ഹലോ എന്ത് പറ്റി ”

ഞാൻ : ” ഹലോ ഒന്നുമില്ല ”

നയന : ” പിന്നെ എന്താ ഒച്ച വയ്ക്കുന്നത് ”

ഞാൻ : ” അതോ ഈ പെണ്ണ് എന്നെ ഉപദ്രവിച്ചതാ ”

നയന : ” ഏത് പെണ്ണ് ”

അവളുടെ ശബ്ദത്തിൽ ഒരു ശങ്ക ഉണ്ട്. ഞാൻ വേറെ എവിടെയെങ്കിലും ആണോ വേറെ പെണ്ണിന്റെ ഒപ്പം ആണോ എന്നാണ് അവളുടെ മനസ്സിൽ എന്ന് എനിക്ക് മനസ്സിലായി. അത് എന്നിൽ ചെറിയ സന്തോഷം വന്നു കാരണം അവൾക്ക് എന്നോട് പോസ്സസീവ്നസ് തോന്നി തുടങ്ങി എങ്കിൽ അതിന്റെ അർത്ഥം അവൾക്ക് എന്നോട് സ്നേഹം ഉണ്ടെന്നാണ്. ഞാൻ ഉള്ളാലെ സന്തോഷിച്ചു എന്നാൽ സ്വാതി അപ്പോളും എന്നെ ഉപദ്രവിക്കുന്നണ്ട്. അവൾ കൈ ചുരുട്ടി എന്റെ മുതുകിൽ ഒക്കെ ഇടിക്കാൻ നോക്കുന്നുണ്ട്. ഞാൻ ഒരു കയ്യ് കൊണ്ട് ഫോൺ പിടിച്ചു മറ്റേ കയ്യ് കൊണ്ട് അവളെ തള്ളി മാറ്റികൊണ്ടിരുന്നു. എന്തായാലും നയനയെ ഒന്ന് ചുറ്റിക്കാൻ ഞാൻ തീരുമാനിച്ചു.

ഞാൻ : ” ഒരു പെണ്ണ് ”

നയന : ” അത് ഏത് പെണ്ണാണ് എന്നാ ഇയാളോട് ചോദിച്ചത് ”

ഞാൻ : ” എന്റെ ഒരു ഫ്രണ്ട്. എന്റെ ഫ്രണ്ടിനെ തനിക്ക് അറിയില്ലല്ലോ ”

നയന : ” സാരമില്ല ഇപ്പൊ പരിചയപ്പെടാം. ഫോൺ ആ പെണ്ണിന് കൊടുക്ക് ”

ഞാൻ : ” അതെന്തിനാ ”

നയന : ” ഇയാൾ ഫോൺ കൊടുക്കുന്നുണ്ടോ ഞാൻ ഫോൺ കട്ട് ചെയ്യണോ ”

ഞാൻ ഉള്ളിൽ ചിരിച്ചു. എന്റെ കൂടെ ഉള്ള പെണ്ണിനോട് സംസാരിച്ചു ഞങ്ങൾ ഇവിടെ എന്താ പരിപാടി എന്ന് അവൾക്ക് അറിയണം അതിനാണ്. അവളുടെ ശബ്ദത്തിൽ നല്ല ദേഷ്യം ഉണ്ടെന്ന് എനിക്ക് മനസ്സിലായി.

ഞാൻ : ” ഹാ ചൂടാവല്ലേ അവൾക്ക് കൊടുക്കാം ”

ഞാൻ സ്വാതിയെ വലിച്ചു മടിയിലേക്ക് കിടത്തി അവളുടെ ചെവിയിൽ ഫോൺ അടുപ്പിച്ചു വച്ചിട്ട് നയന ആണെന്ന് പറഞ്ഞു.

സ്വാതി : ” ഹായ് ചേച്ചി. ”

നയന : ” ചേച്ചിയോ? ഓ ഓ ഇത് സ്വാതിമോൾ ആയിരുന്നോ? ”

സ്വാതി : ” ആ ഞാൻ തന്നെയാ ”

നയന ആകെ ചമ്മിയിട്ടുണ്ടാകും

നയന : ” ആ മോളെ നിങ്ങൾ അവിടെ എത്തിയോ എന്നറിയാൻ വിളിച്ചതാ ” ചമ്മൽ ഒട്ടും പുറത്ത് കാട്ടാതെ നയന പറഞ്ഞു.

സ്വാതി : ” എത്തി ചേച്ചി. ഈ ചേട്ടൻ എന്നെ ഉപദ്രവിക്കുവാ. ഇനി ചേച്ചി കൂടി വന്നിട്ട് വേണം നമുക്ക് രണ്ട് പേർക്കും കൂടി ഈ ചേട്ടനെ ശെരിയാക്കാൻ ”

നയന : ” അത് ഞാൻ ഏറ്റു മോളെ. ഫോൺ ഒന്ന് ചേട്ടന് കൊടുത്തേ ”

സ്വാതി ഫോൺ എനിക്ക് നേരെ നീട്ടി.

ഞാൻ : ” ഹലോ ”

നയന : ” എടൊ ദുഷ്ടാ എന്നേ ഇയാൾ മനഃപൂർവം പറ്റിച്ചതാ അല്ലെ ”

ഞാൻ : ” ഹിഹി അതെ ”

നയന : ” ഞാൻ എന്ത്‌ തെറ്റ് ചെയ്തടോ ഇയാളോട് എന്നെ എപ്പോളും ഇങ്ങനെ ശശി ആക്കാൻ ”

ഞാൻ : ” നയന എന്താ എന്നേ ‘ഇയാൾ’ എന്ന് വിളിക്കുന്നത്. എന്റെ പേര് അറിയില്ലേ ‘സച്ചിൻ’ ”

നയന : ” ഹ്മ്മ് എന്നാൽ സച്ചിൻ…. അല്ല സച്ചേട്ടൻ എന്ന് വിളിക്കാം ”

പെണ്ണ് ചേട്ടാന്ന് വിളിച്ചു തുടങ്ങി. ഇത് ട്രാക്കിൽ തന്നെ എന്ന് എനിക്ക് മനസ്സിലായി

ഞാൻ : ” എനിക്കും അങ്ങനെ വിളിക്കുന്നതാ ഇഷ്ടം ”

നയന : ” സച്ചേട്ടാ നാളെ ഫ്രീ ആണോ ”

ഞാൻ : ” ജോലിക്ക് പോകണം മോളെ അതുകഴിഞ്ഞു വൈകിട്ട് ഫ്രീയാ ”

നയന : ” എന്തുവാ വിളിച്ചേ മോളെന്നോ. ഇപ്പോളെ മോൾ ആക്കിയോ ”

ഞാൻ ചമ്മൽ കൊണ്ട് ചൂളിപ്പോയി. എന്നാലും ഞാൻ വിട്ട് കൊടുത്തില്ല.

ഞാൻ : ” ആക്കി. എന്താ ഇഷ്ടപെട്ടില്ലേ ”

നയന : ” ഇഷ്ടപ്പെട്ടു. ഇനി അത് താത്വികമായി അവലോകനം ചെയ്ത് ഏട്ടനോട് തർക്കിക്കാൻ ഞാനില്ല. ഈ പാവത്തിനെ വിട്ടേക്ക് ”

ഞാൻ : ” നാളെ എന്താ ഫ്രീ ആണോന്ന് ചോദിച്ചത് ”

നയന : ” ഒന്നുമില്ല ഏട്ടാ ചുമ്മാ കാണാനും സംസാരിക്കാനും”

ആഹാ എന്റെ മനസ്സിൽ ലഡ്ഡു പൊട്ടി. ഇവൾക്ക് എന്നെ ഇഷ്ടം ആയിട്ടുണ്ട് ഉറപ്പായി.

ഞാൻ : ” അതിനെന്താ വൈകിട്ട് ഞാൻ മോൾടെ വീടിന്റെ അടുത്ത് ഏതേലും കഫെയിൽ വരാം ”

നയന : ” ഹ്മ്മ് ശരി എവിടെ വരണം എന്ന് ഞാൻ പറയാം ”

ഞാൻ : ” ശെരി മോളെ ”

നയന : ” അച്ഛനെയും അമ്മയെയും അന്വേഷിച്ചെന്ന് പറയണേ. എന്നാ വയ്യ്ക്കുവാണേ ഏട്ടാ. ബൈ ”

ഫോൺ കട്ട് ആയി. ഞാൻ പുഞ്ചിരിച്ചുകൊണ്ട് ആ ഫോണിൽ ഒരുമ്മ കൊടുത്തു . നോക്കുമ്പോൾ അത് നോക്കി നിന്ന് അടക്കി ചിരിക്കുന്ന സ്വാതി. ഞാൻ അവളെ പേടിപ്പിച്ചു ഓടിച്ചു വിട്ടു. ഈ പെണ്ണ് ഏട്ടനേയും ഏട്ടത്തിയെയും ശ്രിങ്കരിക്കാൻ സമ്മതിക്കില്ല ഞാൻ സ്വയം പറഞ്ഞു.

പിറ്റേന്ന് ജോലിയിൽ ഒന്നും എനിക്ക് ശ്രദ്ധിക്കാൻ പറ്റിയില്ല. ഓഫീസിൽ ചുമ്മാ ഇരുന്ന് ദിവാസ്വപ്നം കണ്ടു. എന്റെ കീഴിലുള്ള ജോലിക്കാർക്കൊക്കെ അതിശയം ആയി. സാധാരണ ഒരാൾക്കും നിന്ന് തിരിയാൻ സമയം കൊടുക്കാതെ പണി എടുപ്പിക്കുന്ന കർക്കശക്കാരൻ ആയ എന്റെ ഒഴുക്കൻ പെരുമാറ്റം അവർക്ക് അത്ഭുതം ആയി. ഞാൻ പക്ഷേ എങ്ങനെയും വൈകിട്ട് ആയാൽ മതി എന്ന് ചിന്തിച്ച് ഇരിക്കുകയാണ്. എങ്ങനെയൊക്കെയോ സമയം തള്ളി നീക്കി. അങ്ങനെ വൈകുന്നേരം ആയപ്പോൾ ഞാൻ അവളെ വിളിച്ചു. അവളോട്‌ എവിടെ വരണം എന്ന് ചോദിച്ചപ്പോ അവൾ ലൊക്കേഷൻ വാട്സാപ്പിൽ അയക്കാം എന്ന് പറഞ്ഞു. ഞാൻ പിന്നെ വൈകാതെ ഓഫീസിൽ നിന്ന് ഇറങ്ങി. അവൾ അയച്ചു തന്ന ലൊക്കേഷനിലേക്ക് ഞാൻ ബൈക്ക് പായിച്ചു. അത് ഒരു കോഫി ഷോപ്പ് ആയിരുന്നു. ഞാൻ ചെന്ന് കേറിയപ്പോൾ തന്നെ ഒരു ടേബിളിൽ ഇരുന്ന അവൾ എന്നെ കൈവീശി കാണിച്ചു. ദൂരെ വച്ച് അവളെ കണ്ടപ്പോൾ തന്നെ എനിക്ക് സന്തോഷം തോന്നി. ഒരു വെള്ള ടോപ്പും നീല ജീൻസും ആണ് അവളുടെ വേഷം. ഇന്നലെ പെണ്ണ് കാണാൻ ചെന്നപ്പോൾ കണ്ട മേക്കപ്പ് ഒന്നുമില്ലാത്തത് കൊണ്ട് അവൾ കുറച്ച് കൂടി സുന്ദരി ആയി തോന്നി.

എന്നെ കണ്ടതും അവൾ നുണക്കുഴി കാണിച്ചു ചിരിച്ചു. എന്റെ പൊന്നോ ഈ പെണ്ണ് ചിരിക്കുമ്പോൾ എന്തൊരു ഭംഗി ആണ്. അവളിൽ നിന്ന് കണ്ണെടുക്കാൻ തോന്നുന്നില്ല. ഞാനും അവളെ നോക്കി ചിരിച്ചുകൊണ്ട് അവളുടെ മുൻപിൽ ഉള്ള കസേരയിൽ ഇരുന്നു.

നയന : ” എന്താ ഏട്ടാ ജോലിത്തിരക്ക് അധികം ആണോ ”

ഞാൻ : ” ഹേയ് അല്ല. നീ ഇപ്പൊ ഫുൾ ഫ്രീ ആണല്ലോ അല്ലെ ”

നയന : ” അതെ ഇനി കല്യാണം ഒക്കെ കഴിഞ്ഞിട്ട് മതി M.com. ”

ഞാൻ : ” ഹ്മ്മ് ”

നയന : ” ചേട്ടാ എനിക്ക് ചേട്ടൻ ഇന്നലെ പറഞ്ഞ കാര്യങ്ങൾ ഒക്കെ വച്ചു നോക്കിയപ്പോൾ തന്നെ മനസ്സിലായി ചേട്ടൻ നല്ല ആൾ ആണെന്ന്. ഞാൻ ഫെമിനിസം എന്ന് പറഞ്ഞു നടക്കുന്നതല്ലാതെ അതിനെ കുറിച്ച് ആഴത്തിൽ പഠിച്ചിട്ടൊന്നും ഇല്ല. ”

ഞാൻ : ” ഭർത്താവിന്റെ അടിമ ആയിപോകുമോ എന്ന വലിയ ഭയം ഉണ്ട് നിനക്ക് അതാണ് നീ അങ്ങനെ ഒക്കെ ചിന്തിക്കുന്നത്. പിന്നെ നിന്റെ ചേച്ചിയുടെ അവസ്ഥ നിനക്ക് വരരുത് എന്നു ചേച്ചിയും ആഗ്രഹിക്കുന്നു ”

നയന : ” ചേട്ടാ സ്വാതിയെ എത്ര വേണമെങ്കിലും പഠിപ്പിക്കാൻ ഉള്ള ഏട്ടന്റെയും ഏട്ടന്റെ അച്ഛന്റെയും ആ തീരുമാനം തന്നെ മതി ഒരു പെണ്ണിന് നിങ്ങൾ എത്ര മാത്രം സ്വാതന്ത്ര്യവും പരിഗണനയും കൊടുക്കുന്നുണ്ട് എന്ന് മനസിലാക്കാൻ. സത്യത്തിൽ ഇതുപോലെ ഒരു കുടുംബത്തിലേക്ക് വരാൻ എനിക്ക് സന്തോഷമേ ഉള്ളു. ഏട്ടനും സമ്മതം ആണെങ്കിൽ…………… ”

ഞാൻ : ” നയന നീ എന്തൊക്കെയാ പറയുന്നത്. എനിക്ക് സമ്മതം ആണോന്നോ. ഞാനൊരു സത്യം നിന്നോട് തുറന്നു പറയട്ടെ എനിക്ക് നിന്നെ ഇഷ്ടമാണ്. നിന്റെ ഫോട്ടോ കണ്ടപ്പോൾ മുതൽ നീ എന്നെ കീഴടക്കി. നീ ആലോചിച്ചു നോക്ക് ഇന്നലെ പെണ്ണുകാണാൻ വന്നപ്പോൾ അത്രയും ഡയലോഗ് ഞാൻ അടിച്ചിട്ടും ഇറങ്ങി പോകാതെ നിന്നോട് സംസാരിക്കാൻ ഞാൻ വന്നത് തന്നെ എനിക്ക് നിന്നെ ഇഷ്ടം ആയതുകൊണ്ട് ആണ് ”

അവൾ എന്റെ കണ്ണിലേക്കു തന്നെ നോക്കി. അവളുടെ സ്വപ്നം പൂവണിയുന്ന ഒരു സന്തോഷം ആ മുഖത്ത് കാണാം. എനിക്ക് അത് വായിച്ചെടുക്കാൻ പറ്റും. അവൾ അൽപനേരം കൂടി നോക്കിയിട്ട് എന്റെ നോട്ടം താങ്ങാൻ ആവാതെ തല താഴ്ത്തി. അപ്പോഴേക്കും വെയ്റ്റർ വന്നതുകൊണ്ട് ഞങ്ങളുടെ പ്രണയനിമിഷങ്ങൾക്ക് ഒരു ഇടവേള വന്നു. ഞങ്ങൾ രണ്ടും ഓരോ കോഫി പറഞ്ഞു.

കോഫി നുണഞ്ഞു കൊണ്ട് നയന എന്നെ നോക്കി ചിരിച്ചു. അവളുടെ നുണക്കുഴി കവിളിൽ ഒന്ന് പിടിച്ചുമ്മ വയ്ക്കാൻ തോന്നിയെങ്കിലും ഞാൻ അടങ്ങി ഇരുന്നു.

നയന : ” ഏട്ടാ എനിക്കും ഇഷ്ടമാ ഏട്ടനെ. ഫോട്ടോ കണ്ടപ്പോൾ മുതൽ…. ” നാണം കൊണ്ട് തലകുനിച്ച് അവൾ പറഞ്ഞൊപ്പിച്ചു.

എനിക്ക് ഒരേ സമയം സന്തോഷവും ആശ്ചര്യവും വന്നു. എന്നിട്ടാണോ പെണ്ണെ ഇന്നലെ നീ വലിയ ഫെമിനിസം വിളമ്പിയത്. ഞാൻ മനസ്സിൽ ഓർത്തു. അല്ല അവൾ ചോദിക്കേണ്ടതല്ലേ ചോദിച്ചുള്ളൂ.

ഞാൻ അവളുടെ കയ്യിൽ വിരൽ കോർത്തു. ആദ്യം അവൾ ഒന്ന് ഞെട്ടി കയ്യ് വലിച്ചെങ്കിലും പെട്ടെന്ന് തന്നെ അവൾ എന്റെ കയ്യിൽ പിടിച്ചു. ഞങ്ങൾ പരസ്പരം കൈ കോർത്തു പിടിച്ചു കണ്ണിൽ കണ്ണിൽ നോക്കി ഇരുന്നു.



പിന്നീട് വളരെ പെട്ടെന്നായിരുന്നു എല്ലാം. നിശ്ചയം ഇടിപിടീന്ന് നടന്നു അതുകഴിഞ്ഞു ഒരാഴ്ച്ച കഴിഞ്ഞപ്പോൾ തന്നെ കല്യാണം. ഇതിനിടയിൽ ഞാനും അവളും ഫോണിലൂടെയും നേരിട്ടും ഒക്കെ സംസാരിക്കുന്നതും കാണുന്നതും പതിവായിരുന്നു. ഞങ്ങൾ വളരെ അടുത്തു. ഇപ്പൊ പരസ്പരം പറയാത്ത കാര്യങ്ങൾ ഒന്നുമില്ല. എന്നോട് മാത്രമല്ല സ്വതിയോടും നയന വളരെ അടുത്തു ഇപ്പൊ അവര് രണ്ടു പേരും ഉറ്റസുഹൃത്തുക്കൾ ആയി.

അങ്ങനെ കല്യാണം ഒക്കെ കഴിഞ്ഞു ഞാൻ കാത്തിരുന്ന ആദ്യ രാത്രി എത്തി. എനിക്ക് തീരെ ക്ഷമ നശിച്ചു. എങ്ങനെ എങ്കിലും ബന്ധുക്കൾ ഒക്കെ പോയിട്ട് അവളെയും കൊണ്ട് മുറിയിൽ കേറി വാതിൽ അടച്ചാൽ മതിയെന്നാണ് എനിക്ക്. പെണ്ണിന് പക്ഷെ ധൃതി ഒന്നുമില്ല അവൾ എല്ലാരോടും കുശലം പറഞ്ഞ് ഇരിക്കുകയാണ്. ഞാൻ അവളെ കാണിക്കാൻ വേണ്ടി തന്നെ നടന്ന് എന്റെ റൂമിൽ കയറി. അവൾ അത് കണ്ടു. ഇപ്പൊ തന്നെ വരും എന്ന് എനിക്ക് തോന്നി. ഞാൻ കുറച്ച് നേരം നോക്കിയിട്ടും അവളെ കണ്ടില്ല. അവളെ കാണാതെ പുറത്തേക്ക് തലയിട്ട് എത്തി നോക്കുമ്പോ കാണുന്നത് അമ്മയെ ആണ്.

“എന്താടാ ”

“ഏയ് ഒന്നുമില്ല അമ്മേ ”

ഞാൻ വീണ്ടും മുറിയിലേക്ക് കയറി. കുറച്ച് നേരം കൂടി കഴിഞ്ഞപ്പോ അവൾ വന്നു. ഞാൻ ഒരു വെള്ള ഷർട്ടും മുണ്ടുമാണ് വേഷം. അവൾ ഒരു സെറ്റ് സാരി ആണ് ഉടുത്തിരുന്നത്. സർവ്വാലങ്കാരവിഭൂഷിണിയായ രൂപം. അവളുടെ കയ്യിൽ ഒരു ഗ്ലാസ്‌ പാലുമുണ്ട്. അവൾ അകത്തേയ്ക്ക് കയറി നാണത്തോടെ വന്ന് പാല് ടേബിളിൽ വച്ചു. എന്നിട്ട് അവൾ എന്നേ നോക്കി ചിരിച്ചു.

നയന : ” ഏട്ടാ എനിക്ക് ഈ സെറ്റ് ഉടുത്ത് കിടന്നൊന്നും ശീലമില്ല. ഞാൻ ഡ്രസ്സ്‌ മാറുവാ ”

ഞാൻ : ” ശെരി മാറിക്കോ ”

അവൾ അവളുടെ ഏതോ ഡ്രസ്സ്‌ എടുത്ത് കൊണ്ട് പോയി ബാത്‌റൂമിൽ കയറി. പൊന്നുമോളെ നീ ഡ്രെസ്സ് മാറാൻ എന്തിനാടി ബാത്‌റൂമിൽ പോകുന്നെ ഇനി എല്ലാം ഞാൻ കാണാൻ ഉള്ളതല്ലേ. ആ ഡ്രസ്സ്‌ മാറി വാ. അൽപനേരം കഴിഞ്ഞപ്പോൾ അവൾ പുറത്തിറങ്ങി ഒരു നീല ഷിമ്മി പോലത്തെ ഉടുപ്പ്.ഞാൻ സ്വയം നിയന്ത്രിച്ചു.

ഞാൻ : ” നീ ഇങ്ങനത്തെ ഡ്രസ്സ്‌ ഒക്കെ ഇടുമോ ”

നയന : ” കിടക്കാൻ പോകുമ്പോ മാത്രമേ ഇടു ഏട്ടാ ”

അവൾ അവളുടെ ശരീര വടിവ് മുഴുവൻ പ്രകടമാക്കി എന്റെ മുന്നിലൂടെ നടന്ന് പോയി ആഭരണം ഒക്കെ അലമാരിയിൽ വച്ചു. അവൾ ഉടുത്തിരുന്ന സെറ്റ് അവൾ അലക്കുന്നതിന്റെ കൂടെ ഇട്ടു. അപ്പോളേക്കും ക്ഷമ നശിച്ചു ഞാൻ ചെന്ന് അവളെ പുറകിൽ നിന്ന് കെട്ടിപിടിച്ചു.

നയന : ” ആക്രാന്തം കാണിക്കാതെ ഏട്ടാ ഒന്ന് വിട്ടേ. പാല് കുടിക്കാം ആദ്യം ”

അവൾ എന്റെ പിടി വിടീച്ചു പോയി പാൽഗ്ലാസ്സ് എടുത്തു.

നയന : ” ഏട്ടാ. ഭർത്താവ് കുടിച്ചതിന്റെ ബാക്കി ഭാര്യ കുടിക്കണം എന്നുള്ളതൊക്കെ ബോറൻ ഏർപ്പാട് ആണ് എനിക്ക് അതിലൊന്നും വലിയ താല്പര്യം ഇല്ല. ”

ഞാൻ : ” ഓ എന്നാ നീയത് മുഴുവൻ കുടിച്ചോ ”

നയന : ” അല്ല ഞാൻ കുടിച്ചിട്ട് ബാക്കി തന്നാൽ ഏട്ടൻ കുടിക്കുമോ അത് ”

ഞാൻ : ” നമ്മൾ തമ്മിൽ അങ്ങനെ ഒക്കെ ഉണ്ടോടി. നീ കുടിച്ചതിന്റെ ബാക്കി കുടിക്കാൻ എനിക്ക് ഒരു മടിയും ഇല്ല ”

അവൾ ഉടനെ തന്നെ ആ ഗ്ലാസിൽ പകുതി പാല് കുടിച്ചിട്ട് എനിക്ക് നേരെ നീട്ടി. ഞാൻ അത് സന്തോഷത്തോടെ കുടിച്ചു. ഞാൻ നോക്കുമ്പോൾ അവളുടെ ചുണ്ടിന് മുകളിൽ മീശ പോലെ പാല് പറ്റി പിടിച്ചിരിക്കുന്നു.ആ കാഴ്ച്ച കണ്ട് എനിക്ക് ചിരി വന്നു.

നയന : ” ഹ്മ്മ് മോന്റെ ഉദ്ദേശം എനിക്ക് മനസിലായി”

ഞാൻ : ” ആ അത് തന്നെ പിന്നെ ആദ്യ രാത്രിയിൽ വേറെന്ത് ഉദ്ദേശം. വാടി ഇവിടെ കിടക്ക് ”

നയന : ” നടക്കില്ല മോനെ ”

ഞാൻ അത്ഭുതപ്പെട്ടു

ഞാൻ : ” എന്ത്‌ നടക്കില്ല എന്ന് ”

നയന : ” ഏട്ടന്റെ ഉദ്ദേശം ”

ഞാൻ : ” നീ എന്തൊക്കെയാടി ഈ പറയുന്നേ ”

നയന : ” ഞാൻ തമാശ പറഞ്ഞതല്ല. ഇന്ന് നടക്കില്ല ”

ഞാൻ : ” എന്ത് പറ്റി എന്തെങ്കിലും ആരോഗ്യ പ്രശ്നം ഉണ്ടോ ”

നയന : ” ആരോഗ്യ പ്രശ്നം ഒന്നുമില്ല. എനിക്ക് ഇന്ന് താല്പര്യം ഇല്ല അതുകൊണ്ട് നടക്കില്ല ”

ഞാൻ ആകെ കിളിപോയ അവസ്ഥയിൽ ആയി. ഈ പെണ്ണിന് ഇതെന്ത് പറ്റി. ആദ്യരാത്രിയിൽ ഇങ്ങനെ പച്ചയ്ക്ക് നിരാശപ്പെടുത്താമോ ഭർത്താവിനെ. ഇതിപ്പോ ഇവൾ ഇന്ന് ഒന്ന് റസ്റ്റ്‌ താ ചേട്ടാ എന്ന് ചോദിച്ചിരുന്നെങ്കിൽ കുഴപ്പം ഇല്ലായിരുന്നു ഇതൊരുമാതിരി എന്നെ വെറും മണ്ടൻ ആക്കുന്ന പോലെ. എന്തൊക്കെ പ്രതീക്ഷകൾ ആയിരുന്നു. ഉണ്ണാൻ വിളിച്ചിരുത്തിയിട്ട് ചോർ ഇല്ലെന്ന് പറയുന്ന പോലെ. എന്റെ മനസ്സിൽ നിരാശയും ദേഷ്യവും ഒക്കെ വന്നു. എന്റെ മുഖം വലിഞ്ഞു മുറുകി. അവൾ ആണെങ്കിൽ ഒരു കൂസലും ഇല്ലാതെ എന്റെ മുന്നിൽ നിന്ന് ചിരിക്കുന്നു. ദേഷ്യം നിയന്ത്രിക്കാൻ ആയി ഞാൻ അവളെ നോക്കാതെ ജനലിന്റെ അവിടെ പോയി തിരിഞ്ഞു നിന്നു.

നയന : ” എന്റെ പൊന്ന് ഏട്ടാ ദേഷ്യം പിടിച്ചിട്ട് കാര്യം ഒന്നുമില്ല. എനിക്ക് ഇപ്പൊ ഇഷ്ടമില്ല. ഏട്ടൻ എന്തൊക്കെ പറഞ്ഞാലും എനിക്ക് സമ്മതമില്ല. ”

ഞാൻ ദേഷ്യം കടിച്ചു പിടിച്ച് വളരെ ശാന്തൻ ആയി അവളോട്‌ സംസാരിക്കാൻ തുടങ്ങി

ഞാൻ : ” എടി ഞാൻ കുറെ ആശിച്ചു വന്നതാ. നിനക്ക് എന്താ പ്രശ്നം എന്നെങ്കിലും പറ ”

നയന : ” എനിക്ക് അങ്ങനെ പ്രശ്നം ഒന്നുമില്ല. ഇന്ന് താല്പര്യം ഇല്ല അത്രതന്നെ “. അവൾ ഒരു കൂസലും ഇല്ലാതെ പറഞ്ഞു.

ഞാൻ പതഞ്ഞു പൊന്തിയ ദേഷ്യം എങ്ങനെയോ നിയന്ത്രിച്ചു. ഞാൻ അവളിൽ നിന്ന് നോട്ടം മാറ്റി.

നയന : ” ഈ ആണുങ്ങൾക്ക് ഒരു വിചാരം ഉണ്ട്. അവർ എപ്പോ വന്ന് ചോദിച്ചാലും സമ്മതിച്ചു കൊടുക്കാൻ ഉള്ള ഉപകരണം ആണ് ഭാര്യ എന്ന്.
എന്നെ അതിന് കിട്ടില്ല. എനിക്ക് കൂടി തോന്നണം അല്ലാതെ ഏട്ടന് ഇഷ്ടമുള്ളപ്പോ കിടന്ന് തരാൻ ഉള്ള കളിപ്പാവ അല്ല ഞാൻ ”

ഞാൻ രൂക്ഷമായി അവളെ ഒന്ന് നോക്കി.

നയന : ” ഇനി ബലം പ്രയോഗിക്കാനാണെങ്കിൽ അത് വ്യാമോഹം ആണ് മോനെ. എന്റെ അടുത്ത് ആണത്തം കാണിക്കാൻ വന്നാൽ നല്ല രീതിയിൽ എന്റെ കയ്യീന്ന് കിട്ടും. ഞാനെ കുറച്ച് നാൾ കരാട്ടെ പഠിച്ചതാ ” അത് പറഞ്ഞിട്ട് അവൾ അവളുടെ വലത് കാൽ നിഷ്പ്രയാസം ഉയർത്തി എന്റെ മൂക്കിൽ ഒന്ന് തോണ്ടി.

കരാട്ടെയോ പക്ഷെ ഇവൾ ഇത് എന്നോട് പറഞ്ഞിട്ടേ ഇല്ലല്ലോ. പക്ഷെ അവൾ അത്രയും ഉയരത്തിൽ കാൽ പൊക്കിയത് കണ്ട് ഞാൻ ഒന്ന് ഞെട്ടിപ്പോയി. പക്ഷേ എന്റെ ദേഷ്യം എനിക്ക് നിയന്ത്രിക്കാൻ ആയില്ല. ഞാൻ സകല നിയന്ത്രണവും വിട്ട് അവളുടെ തോളിൽ പിടിച്ചു.

ഞാൻ : ” എന്നാൽ കാണട്ടെടി നിന്റെ കരാട്ടെ”

ഞാൻ അവളെ വലിച്ചടുപ്പിച്ചു പൊക്കിയെടുത്തു കട്ടിലിലേക്ക് എറിഞ്ഞു.ഞൊടിയിടയിൽ ഞാൻ കട്ടിലിലേക്ക് ചാടിക്കയറി. അവളുടെ വയറ്റിൽ കാൽ രണ്ടു വശത്തും ഇട്ട് ഞാനിരുന്നു. അവളുടെ മുഖത്താകട്ടെ ഇപ്പൊ ധൈര്യം ഒന്നുമില്ല ഒരു ഭയം ആണ്. ” അയ്യോ ” പേടി കൊണ്ട് അവൾ കരഞ്ഞു.
ഞാൻ അവളുടെ രണ്ടു കയ്യും പിടിച്ച് അവളുടെ തലയുടെ മുകളിൽ ഒറ്റകൈയ് കൊണ്ട് ചേർത്ത് വച്ചു. അവൾ ഭയത്തോടെ എന്നെ നോക്കുകയാണ്. ഞാൻ എന്റെ മറ്റേകൈ അവളെ കാണിച്ചു കൊണ്ട് മുഷ്ടി ചുരുട്ടി. അവൾ അതൊക്കെ കണ്ടു പേടിച്ചു.

ഞാൻ : ” എവിടെടി നിന്റെ കരാട്ടെ ”

ഞാൻ അതും പറഞ്ഞ് ചുരുട്ടിയ മുഷ്ടി അവളുടെ മുഖത്തേക്ക് ഇടിക്കുന്നത് പോലെ വേഗത്തിൽ കൊണ്ട് വന്നു. യാതൊരു പ്രതിരോധവും ഇല്ലാത്തത് കൊണ്ട് അവൾ അവളുടെ കണ്ണുകൾ ഇറുക്കി അടച്ചു. പേടി കൊണ്ട് വിറയ്ക്കുന്നുണ്ട് അവൾ. ഞാൻ പക്ഷെ അവളെ ഇടിച്ചൊന്നും ഇല്ല. എനിക്ക് അതിന് മനസ്സ് വന്നില്ല. എങ്ങനെ ഇടിക്കും എന്റെ പ്രണയിനിയെ എന്റെ ഭാര്യയേ. അവളെ വേദനിപ്പിക്കുന്നത് എനിക്ക് തന്നെ സഹിക്കില്ല. ഞാൻ അവളെ വിട്ട് അവളുടെ അടുത്ത് തന്നെ കിടന്നു.

ഇടി കിട്ടാത്ത ആശ്വാസത്തിൽ അവൾ എന്നെയും പേടിയോടെയും അത്ഭുതത്തോടെയും നോക്കി. ഞാൻ അവളെ കയ്യിൽ പിടിച്ചു വലിച്ച് എന്റെ അടുത്തേക്ക് കൂടുതൽ ചേർത്ത് കിടത്തി. അവൾ അത് ആഗ്രഹിച്ചത് പോലെ എന്റെ നെഞ്ചിലേക്ക് മുഖം പൂഴ്ത്തി എന്റെ കൈകളുടെ ഉള്ളിൽ ഒതുങ്ങി കിടന്നു. ശേ അവളെ ഒരു നിമിഷത്തേക്ക് എങ്കിലും ഉപദ്രവിക്കാൻ തോന്നിയല്ലോ എന്നോർത്തു ഞാൻ എന്നെ തന്നെ ശപിച്ചു. അല്ലെങ്കിൽ തന്നെ ഈ ലൈംഗിക ബന്ധം വാശി പിടിച്ചു വാങ്ങാൻ പറ്റുമോ രണ്ട് പേർക്കും തോന്നണ്ടേ. ഞാൻ ഒരു ക്ഷമാപണം എന്ന നിലയിൽ അവളുടെ നെറ്റിയിൽ ഒന്ന് മുത്തി അതിന്റെ പ്രതികരണം എന്ന പോലെ അവൾ എന്റെ അടുത്തേക്ക് കൂടുതൽ ചുരുണ്ടു കൂടി.

എന്തായാലും അവൾക്ക് ഇന്ന് താല്പര്യം ഇല്ല എന്നാ പിന്നെ ഇവളെ കെട്ടിപിടിച്ചു കിടന്ന് ഉറങ്ങിയേക്കാം എന്ന് കരുതി ഞാൻ കയ്യെത്തിച്ച് ലൈറ്റ് ഓഫ്‌ ചെയ്തു. ഉറങ്ങിയേക്കാം എന്ന് കരുതി ഞാൻ കണ്ണടച്ച് കിടന്നു. എന്നാൽ എന്റെ നെഞ്ചിൽ മുഖം പൂഴ്ത്തി കിടക്കുന്ന നയന കിടന്ന് കുലുങ്ങുന്നത് പോലെ തോന്നി. ഇനി ഇവൾ കരയുകയാണോ. എനിക്ക് സംശയം ആയി. ഞാൻ കയ്യെത്തിച്ച് ലൈറ്റ് ഇട്ടു. എന്നിട്ട് അവളെ എന്റെ നെഞ്ചിൽ നിന്നും എടുത്ത് മാറ്റി. അപ്പോൾ ഞാൻ കണ്ട കാഴ്ച്ച അവൾ കിടന്നു കുലുങ്ങി ചിരിക്കുന്നു. ഇതെന്ത് കൂത്ത്. ഇവൾക്ക് ഇനി വട്ടുണ്ടോ.

ഞാൻ : ” എന്താടി കിടന്ന് കിണിക്കുന്നേ ”

അവൾ ചിരി നിർത്തി എന്നെ നോക്കി എന്നിട്ട് പെട്ടെന്ന് എന്റെ കവിളുകളിൽ പിടിച്ച് എന്റെ ചുണ്ടിൽ ഒരുമ്മ തന്നു. ഞാൻ പെട്ടെന്ന് ഒന്ന് പതറി.

നയന : ” എനിക്ക് സന്തോഷം വന്നിട്ട് ”

ഞാൻ : ” എന്താണാവോ ഇത്ര സന്തോഷം ആദ്യ രാത്രിയിൽ എന്നെ പട്ടിണിക്കിടുന്നതാണോ ”

നയന : ” ങ്ങുഹും” അവൾ നിഷേധാർത്ഥത്തിൽ പറഞ്ഞു.

ഞാൻ : ” പിന്നെ? ”

നയന : ” എന്റെ കെട്ടിയോൻ ഒരു മാന്യൻ ആണെന്ന് തിരിച്ചറിഞ്ഞത് കൊണ്ട് ”

ഞാൻ : ” നീ എന്തൊക്കെയാ പറയുന്നേ ”

നയന : ” ഞാൻ ഏട്ടനെ ഒന്ന് ടെസ്റ്റ്‌ ചെയ്തതാ ”

ഞാൻ : ” മനസിലായില്ല ”

നയന : ” എടാ ഏട്ടാ ബുദ്ദുസ് ഇതൊക്കെ എന്റെ ഒരു നമ്പർ അല്ലെ. ഞാൻ മനഃപൂർവം ഈ കുട്ടിനിക്കറും കുഞ്ഞുടുപ്പും ഇട്ടു വന്നത് ഏട്ടന്റെ കണ്ട്രോൾ കളയാൻ വേണ്ടി തന്നെയാ. അപ്പൊ ഏട്ടൻ ഒരുമാതിരി ആണുങ്ങളുടെ ഈഗോ വച്ച് ബലം പ്രയോഗിക്കുമോ എന്ന് ഞാൻ നോക്കിയതാ. ബട്ട് യൂ ആർ റിയലി എ ജന്റിൽമാൻ. എന്നെ ഒന്ന് വേദനിപ്പിച്ചു കൂടിയില്ല. ഇപ്പോൾ ആണ് എനിക്ക് ഏട്ടനെ കൂടുതൽ ഇഷ്ടമായെ ”

ഞാൻ : ” അപ്പൊ ഞാൻ ബലമായി ചെയ്തിരുന്നെങ്കിൽ ”

നയന : ” സ്വന്തം കെട്ടിയോൻ അല്ലെ പോട്ടെന്നു വയ്ക്കും പക്ഷെ ഇപ്പോൾ തോന്നുന്ന ഇഷ്ടം തോന്നില്ല ”

ഞാൻ : ” അപ്പൊ കരാട്ടെ അറിയാമെന്നു പറഞ്ഞത് ”

നയന : ” അത് ഞാൻ ചുമ്മാ തള്ളിയതല്ലേ. മണ്ടച്ചാർ വിശ്വസിച്ചോ? ”

ഞാൻ : ” അപ്പൊ നീ കാൽ ഒക്കെ പൊക്കി എന്റെ മൂക്കിൽ തൊട്ടത്? ”

നയന : ” അതോ ഞാൻ നല്ല ഡാൻസർ ആണ്. കുറെ നാൾ പഠിച്ചതാ. ക്ലാസിക്കലും അതുപോലെ വെസ്റ്റണും. കുറെ അക്രോബാറ്റിക് സ്‌റ്റെപ്സ് ഒക്കെ ചെയ്ത് നല്ല ഫ്ലെക്സിബിലിറ്റി ഉണ്ട് അത്രേ ഉള്ളു ”

ഞാൻ : ” എടി നീ എന്നെ നന്നായിട്ട് പറ്റിച്ചല്ലേ ”

നയന : ” യെസ് ഡിയർ എന്ത് ചെയ്യാം ഏട്ടന് എന്നെപോലെ ബുദ്ധി ഇല്ലല്ലോ ”

ഞാൻ : ” നിന്നെ ശെരിയാക്കി തരാമെഡി ”

ഞാൻ അവളെ ചുറ്റിപ്പിടിച്ച് വയറ്റിൽ ഒക്കെ ഇക്കിളി ഇടാൻ തുടങ്ങി. അങ്ങനെ കളിയും ചിരിയും നിറഞ്ഞ ഒരു സുന്ദര രാത്രിയായി മാറി...


ദിവസങ്ങൾ കടന്നു പോയി. കല്യാണം പ്രമാണിച്ചു ഞാൻ അവധി എടുത്തിരുന്ന ദിവസങ്ങളിൽ ഞങ്ങൾ വിരുന്നിന് ഒക്കെ പോയി. നയന എന്റെ അമ്മയോടും സ്വതിയോടും വളരെ അടുത്തു. സ്വാതിയും നയനയും ഏകദേശം ഒരേ ചിന്താഗതി ഉള്ളവർ ആയിരുന്നു. അതുകൊണ്ട് അവർ തമ്മിൽ വളരെ പെട്ടെന്ന് കൂട്ടായി. എന്റെ അമ്മ പൊതുവെ ഒരു പാവം ആയിരുന്നു അതിനാൽ തന്നെ അമ്മായിയമ്മ പോര് നാത്തൂൻ പോര് ഒന്നും വീട്ടിൽ ഉണ്ടായില്ല. എനിക്ക് വേണ്ടി പാചകം ചെയ്യില്ല എന്ന് പറഞ്ഞിരുന്ന നയന പക്ഷെ ഇപ്പൊ എന്റെ എല്ലാ കാര്യങ്ങളും നോക്കും. മാത്രമല്ല സ്കൂളിൽ പോകുന്ന സ്വാതിക്ക് വരെ ചോറ് പൊതിഞ്ഞു കൊടുക്കുന്നത് അവളാണ്. സ്വാതി +2 ആയത് കൊണ്ട് അവളെ പഠിക്കാനും നയന സഹായിക്കും. എന്റെ അച്ഛനോടും അവൾക്ക് വലിയ ബഹുമാനം ആയിരുന്നു.

കിടപ്പറയിൽ അവൾ വളരെ സഹകരണം ആയിരുന്നു. എന്റെ ഇഷ്ടങ്ങൾ ഒക്കെ അവൾ തീർത്തു തരും.

അങ്ങനെ ഇരിക്കെ ഒരു ദിവസം അവൾ കിടക്കാൻ നേരം എന്റെ അടുത്ത് കൊഞ്ചി കുഴഞ്ഞു.

നയന : ” ഏട്ടാ എന്റെ കാൽ ഒന്ന് തിരുമ്മി താ ”

എനിക്ക് കാര്യം മനസ്സിലായി. ഇത് ഇവൾ എന്നെ ടെസ്റ്റ്‌ ചെയ്യുന്നത് തന്നെ. ഭാര്യയുടെ കാലു തടവി കൊടുക്കുന്നതിൽ എനിക്ക് കുറച്ചിലോ ഈഗോയോ ഉണ്ടോന്ന് അറിയാൻ ആണ് അവളുടെ ശ്രമം. ഈ പെണ്ണിന് ഇത്രയും ആയിട്ടും എന്നെ മനസിലായില്ല. ഞാനും ഒന്ന് കളിക്കാൻ തീരുമാനിച്ചു.

ഞാൻ : ” പിന്നെ നിന്റെ കാൽ തിരുമ്മാൻ. ഒന്ന് പോടീ പെണ്ണെ ”

നയന : ” ഏട്ടാ ഒന്ന് തിരുമ്മു പ്ലീസ് ”

ഞാൻ : ” അയ്യേ ഭാര്യയുടെ കാൽ തിരുമ്മാനൊ. വേറെ ആളെ നോക്ക്. എനിക്കെങ്ങും വയ്യ ”

നയന : ” എന്തുവാ ഏട്ടാ എന്റെ കാൽ അല്ലെ ”

ഞാൻ : ” പോടീ അവിടുന്ന് ”

ഇതും പറഞ്ഞു ഞാൻ പുതച്ച് മൂടി ഒറ്റ കിടത്തം. അവളുടെ മുഖം കടന്നൽ കുത്തിയത് പോലെ വീർത്തു. എന്നെ കെട്ടിപിടിക്കാതെ അവൾ ദേഷ്യത്തോടെ തിരിഞ്ഞു കിടന്നു. ഞാൻ ഉള്ളിൽ ചിരിച്ചു. ഈ പെണ്ണിന്റെ ഒരു കാര്യം. എന്നെ വീണ്ടും ടെസ്റ്റ് ചെയ്ത് മണ്ടൻ ആക്കാനല്ലേ. വേല കയ്യിലിരിക്കട്ടെ പെണ്ണെ. എന്തായാലും ഇന്ന് ഇവൾ പിണങ്ങി കിടക്കട്ടെ അല്ല പിന്നെ. പതിയെ ഞാൻ ഉറക്കത്തിലേക്ക് വഴുതി വീണു.

” അയ്യോ ആാാ ആാാ “. നയനയുടെ ഉറക്കെ ഉള്ള നിലവിളി കേട്ടു ഞാൻ ഞെട്ടി എണീറ്റു. സത്യത്തിൽ എന്താണ് നടക്കുന്നത് എന്ന് തിരിച്ചറിയാൻ ഞാൻ ഒരു നിമിഷം എടുത്തു. കട്ടിലിൽ എണീറ്റ് ഇരുന്ന് പുളയുകയാണ് നയന. ഞാൻനോക്കുമ്പോൾ അവളുടെ ഇടത് കാലിന്റെ കാഫിൽ മസിൽ പിടിച്ചിരിക്കുന്നു. രാത്രിയിൽ ഉറക്കത്തിൽ കാൽ നിവർത്തിയാൽ ചിലപ്പോ ഇങ്ങനെ കേറി പിടിക്കും. ഞാൻ പെട്ടെന്ന് തന്നെ അവളുടെ ഇടത് കാൽ എടുത്തു പിടിച്ചു. നോക്കുമ്പോൾ ഒരു ഷോട്പുട്ട് കണക്ക് മസിൽ ഉരുണ്ടു കൂടി ഇരിക്കുന്നു. എനിക്ക് കാൽ പിടിച്ചു വയ്ക്കാൻ പോലും പറ്റാതെ അവൾ പുളയുകയാണ്. ഞാൻ അവളുടെ കാൽ പിടിച്ചു വച്ച് ആ മസിൽ തിരുമ്മി ഉടച്ചു. അൽപനേരം തിരുമ്മിയപ്പോ അവൾക്ക് ആശ്വാസം ആയി.

ഞാൻ കുറച്ച് നേരം കൂടി അവിടെ തിരുമ്മി കൊണ്ടിരുന്നു. അവളുടെ കാഫ് നല്ലത് പോലെ തിരുമ്മി ഉടച്ചു ഞാൻ. അവൾ അപ്പോളേക്കും എന്നെ നോക്കി ചിരിക്കുകയായിരുന്നു.

നയന : ” ഓ എന്തായിരുന്നു പ്രകടനം ഭാര്യയുടെ കാൽ തിരുമ്മാൻ വേറെ ആളെ നോക്കാൻ ഒക്കെ പറഞ്ഞിട്ട് ഇപ്പൊ ആരാ തിരുമ്മുന്നേ ”

ഞാൻ : ” അത് പിന്നെ മസിൽ പിടിച്ചത് കൊണ്ടാ ” ഞാൻ വളിച്ച ഒരു ചിരി ചിരിച്ചു.

നയന : ” ഓ പിന്നെ കള്ളം പറയാതെടാ നിന്നെ എനിക്ക് അറിയതില്ലേടാ സച്ചേട്ടാ. ”

അതുംപറഞ്ഞ അവൾ എന്റെ മേലേക്ക് പടർന്നു കയറി......



അങ്ങനെ ജീവിതം സുഖമായി പൊയ്ക്കൊണ്ടിരുന്നു. സ്വാതി +2 നല്ല മാർക്കോടെ പാസ്സ് ആയി. അവൾക്ക് bcom വേണം എന്നാണ്. അപ്പൊ നയനയ്ക്ക് mcom കൂടി രണ്ടിനെയും ഒരേ കോളേജിൽ ചേർത്താലോ എന്ന് ഞാൻ ആലോചിച്ചു. എന്റെയും അവരുടെയും ഭാഗ്യത്തിന് രണ്ട് പേർക്കും ഒരേ കോളേജിൽ അഡ്മിഷൻ കിട്ടി. അത് സർക്കാർ കോളേജ് ആയിരുന്നത് കൊണ്ട് വലിയ ഫീസും ഇല്ല.

ഇനിയിപ്പോ അധികം വൈകാതെ അവളും കോളേജിൽ പോകും അതോടെ പഠിത്തം ആയാൽ പിന്നെ അവളെ എന്നും കിട്ടില്ലലോ.അടുത്ത ദിവസങ്ങൾ ഞങ്ങൾ കൂടുതൽ ആഘോഷിച്ചു....

അങ്ങനെ ഇരിക്കെ ഒരു ദിവസം ഞാൻ നോക്കുമ്പോൾ സ്വാതിയുടെ മൊബൈൽ കട്ടിലിൽ കിടക്കുന്നു. ഞാൻ നോക്കിയപ്പോൾ എന്തോ മെസ്സേജ് വന്നു. വെറുതേ ഒന്ന് തോണ്ടിയപ്പോൾ അത് ഓപ്പൺ ആയി. അവളുടെ ചേച്ചിയാണ് മെസ്സേജ് അയച്ചത്. ഞാൻ വെറുതേ നോക്കി. അവളുടെ ചേച്ചി അയച്ച മെസ്സേജ് കണ്ട് ഞാൻ ഒന്ന് ഞെട്ടി.

‘ എടി പെണ്ണെ നീയൊരു മണ്ടിയാ ഒരു അടിമയെപ്പോലെ നീ അവന് എല്ലാം ചെയ്ത് കൊടുത്തു. ഇനി നീ കോളേജിൽ പോയാലും നിന്നെ കൊണ്ട് അവൻ വീട്ടുവേല ചെയ്യിക്കും ‘

ഞാൻ ഞെട്ടിപ്പോയി. ഈ ചേച്ചിക്ക് എന്തിന്റെ പ്രശ്നമാണ് . ഞാൻ മുകളിലേക്ക് മെസ്സേജ് ഒക്കെ നോക്കി. എല്ലാം ഇത്തരം കുരുട്ട് മെസ്സേജ് ആണ്. പെട്ടെന്ന് അടുത്ത മെസ്സേജ് വന്നു ‘ നിനക്ക് ചേച്ചിയുടെ അവസ്ഥ വരേണ്ടെങ്കിൽ നീ ചേച്ചി പറയുന്നത് കേൾക്ക്. നീ അവന് ഒന്നും ചെയ്ത് കൊടുക്കരുത്. ഈ ആണുങ്ങൾക്ക് ഇതൊക്കെ ചെയ്ത് കൊടുത്ത് ശീലിപ്പിച്ചാൽ പിന്നെ പണി ആകും ‘എനിക്ക് അവളുടെ ചേച്ചിയോട് കനത്ത ദേഷ്യം തോന്നി. വളരെ സന്തോഷത്തോടെ ആണ് ഞാൻ കഴിയുന്നത്. എന്റെ ഭാര്യക്ക് എല്ലാ സുഖവും സ്വാതന്ത്ര്യവും കൊടുക്കുന്നുണ്ട്. വീട്ടുവേല ചെയ്യാൻ ഇതുവരെ നിര്ബന്ധിച്ചില്ല അതൊക്കെ അവൾ സ്വയം ചെയ്യുന്നതാ. അവളുടെ ഇഷ്ടപ്രകാരം അവളെ കോളേജിലും ചേർത്തു. പിന്നെ ഞാൻ ജോലിക്ക് പോകുന്ന ആൾ അല്ലെ അപ്പൊ വീട്ടുജോലി കൂടി എനിക്ക് ചെയ്യാൻ പറ്റുമോ. അതിനിടയിൽ ഈ പെണ്ണുംപിള്ള കുത്തിത്തിരുപ്പ് ഉണ്ടാക്കുന്നത് എന്തിനാ. അവരുടെ കെട്ടിയോൻ കുടുംബം നോക്കാതെ ഭാര്യയേ തല്ലുന്ന ഒരുത്തൻ ആയതുകൊണ്ട് എല്ലാ ആണുങ്ങളും അങ്ങനെ ആണെന്നാണ് അവരുടെ വിചാരം.

ഞാൻ എന്തായാലും ഇതൊന്നും നയനയോട് ചോദിച്ചില്ല. അവളുടെ പെരുമാറ്റത്തിൽ എന്തെങ്കിലും മാറ്റം ഉണ്ടോ എന്ന് മാത്രം ഞാൻ നോക്കി. 5 ദിവസം കഴിഞ്ഞപ്പോൾ ആണ് ഒരു കാര്യം എന്റെ ശ്രദ്ധയിൽ പെട്ടത്. സാധാരണ എന്റെ തുണി അലക്കുന്നത് നയന ആണ്. അവളുടെ ചേച്ചി മെസ്സേജ് അയച്ചതിൽ പിന്നെ കഴിഞ്ഞ 5 ദിവസം അവൾ തുണി അലക്കിയിട്ടില്ല. അവളുടെ ചേച്ചി പറഞ്ഞത് അവൾക്ക് പേടി ആയിട്ടുണ്ട് എന്നെ കുറിച്ച്. അന്നൊരു ഞായറാഴ്ച ആയിരുന്നു. പിന്നെ ഞാൻ ഒന്നും നോക്കിയില്ല. ഞങ്ങളുടെ മുറിയിൽ കിടന്ന തുണി മുഴുവൻ എന്റെയും അവളുടെയും അടിവസ്ത്രം അടക്കം എല്ലാം ബക്കറ്റിൽ ഇട്ടു കൊണ്ട് നേരെ അലക്കാൻ പോയി.

പതിവില്ലാതെ ഞാൻ അലക്കാൻ പോകുന്നത് കണ്ടു നയന ഞെട്ടി.

നയന : ” ഏട്ടാ ഇതൊക്കെ എടുത്ത് എങ്ങോട്ട് പോണു ”

ഞാൻ : ” മുഷിഞ്ഞ തുണിയാ. എന്തായാലും നീ അലക്കുന്നില്ല എന്ന് കരുതി ഇടാൻ തുണി വേണ്ടേ ”

നയന : ” എന്റെ അടിവസ്ത്രം ഒക്കെ….. ”

ഞാൻ : ” അതും അലക്കിയല്ലേ പറ്റു. നീ ചെയ്യുന്നില്ല അപ്പൊ ഞാൻ ചെയ്യാം. എനിക്ക് ഞായറാഴ്ച അല്ലെ ഒഴിവുള്ളു. ”

നയന : ” അയ്യോ ഏട്ടാ നിക്ക് ഞാൻ ചെയ്യാം. ”

ഞാൻ : ” ഇത്രയും ദിവസം ചെയ്തില്ലല്ലോ. അപ്പൊ ഇനി ചെയ്യണ്ട ”

നയന എന്റെ കയ്യിൽ പിടിച്ചു ബക്കറ്റ് വാങ്ങാൻ നോക്കി. എന്നാൽ ഞാൻ നേരെ നടന്ന് അലക്കുകല്ലിന്റെ അടുത്ത് പോയി തുണി വെള്ളത്തിൽ മുക്കി. അവൾ എന്റെ പുറകെ വന്നു. എങ്ങനെയും എന്നെ പിന്തിരിപ്പിക്കാൻ അവൾ നോക്കി. എന്റെയും അവളുടെയും പ്രവർത്തി നോക്കി സ്വാതിയും അമ്മയും ചിരിക്കുകയാണ്. അതും കൂടി ആയതോടെ നയന കരയാൻ തുടങ്ങി. അവൾ എന്റെ കയ്യിൽ കേറി പിടിച്ചു ” ഏട്ടാ പ്ലീസ് ”

ഞാൻ : ” എടി പോത്തേ നിന്നോട് ഞാൻ എന്നെങ്കിലും പറഞ്ഞിട്ടുണ്ടോ എന്റെ തുണി അലക്കി തന്നോളണം എന്ന് ”

നയന : ” ഇല്ല ”

ഞാൻ : ” ഇത്രയൊക്കെ ആയിട്ടും ചേച്ചി ഒരു മെസ്സേജ് അയച്ചപ്പോ എന്നെ സംശയം അല്ലെ ”

നയന : ” മെസ്സേജ് കണ്ടോ അപ്പൊ ”

ഞാൻ : “ആ കണ്ടു ”

നയന : ” മറ്റുള്ളവരുടെ മൊബൈൽ നോക്കുന്നത് അത്ര നല്ല സ്വഭാവം അല്ല കേട്ടോ ”

ഞാൻ : ” ആഹാ ഒറ്റ കുത്ത് വച്ചു തന്നാലണ്ടല്ലോ ”

ഞാൻ അവളെ ഒന്ന് കുത്തി.

നയന : ” അയ്യോ എന്റെ വയറു. എടാ ദുഷ്ട കൊല്ലും ഞാൻ ”

സ്വാതി : ” കൊടുക്ക് ചേച്ചി നല്ലപോലെ കൊടുക്ക് ”

നയന എന്നെ നോക്കി ചിരിച്ചു. ” ഏട്ടാ ഞാൻ അലക്കാം ഏട്ടൻ പൊക്കോ പ്ലീസ് ”

ഞാൻ : ” എന്തായാലും ഇന്ന് ഞാൻ അലക്കാം. ഇനിയും തുണി മുഷിഞ്ഞു കിടന്നാൽ ഞാൻ അലക്കും എന്റെ ആയാലും നിന്റെ ആയാലും. ”

നയന എന്റെ കയ്യിൽ തൂങ്ങി നിന്ന് സ്വാതിയോ അമ്മയോ കാണുന്നില്ല എന്ന് ഉറപ്പ് വരുത്തി എനിക്ക് ഒരുമ്മ തന്നു

*******************************************************************

സ്വാതി പറഞ്ഞത് പോലെ ഒരു സ്കൂട്ടി ഞാൻ വാങ്ങി. ഇപ്പൊ രണ്ട് പേരും ഒരുമിച്ചാണ് കോളേജിൽ പോക്ക്. എല്ലാ ആണുങ്ങളും അവളുടെ ചേച്ചിയുടെ ഭർത്താവിനെ പോലെ അല്ലെന്ന് നയനയ്ക്ക് മനസിലായി. ഇപ്പൊ ആർക്കാണോ സൗകര്യപ്പെടുന്നത് അവര് വീട്ടുജോലി ചെയ്യും ആൺപെൺ വ്യത്യാസം ഇല്ലാതെ.




  - VICHU DE COEUR.....