രചന: Ajwa
"നിന്നോട് ഞാൻ പറഞ്ഞത് അല്ലേ തിരിച്ചു വരുമ്പോ നടന്നു വന്നാൽ മതി എന്ന്,,, എന്നിട്ട് അവൻ വന്നിരിക്കുന്നു ഓട്ടോ പിടിച്ചു കൊണ്ട്... അതിന് ഉള്ള പണം നിന്റെ അച്ഛൻ ഉണ്ടാക്കി വെച്ചിരിക്കുന്നുണ്ടോ ഇവിടെ...? "
അച്ഛന്റെ സ്ഥിരം കലാ പരിപാടി കണ്ടു കൊണ്ടാണ് മീനാക്ഷി ഗേറ്റ് കടന്നു വന്നത്... പല്ലും കടിച്ചു സ്കൂട്ടർ സ്റ്റാൻഡിൽ നിർത്തി അവൾ ഒന്ന് നോക്കി അകത്തേക്ക് നടന്നു... മുന്നിൽ നിന്നു എല്ലാം കേട്ട് വായും പൊളിച്ചു നിക്കുന്ന അപ്പുനെ നോക്കി ഒന്ന് പുച്ഛിച്ചു കാണിച്ചു...
"ഇന്ന് എന്താടി നിനക്ക് ഇത്രയും കനം... "
അച്ഛൻ അവളുടെ മുഖം കണ്ടു അവനിൽ നിന്നും നോട്ടം മാറ്റി കൊണ്ട് ചോദിച്ചു...
"ഇന്ന് രണ്ട് ബുക്ക് എക്സ്ട്രാ ഉണ്ട് അത് കൊണ്ടാവും... "😏
അവൾ അച്ഛനെയും പുച്ഛിച്ചു കൊണ്ട് അകത്തേക്ക് കയറി,,, അച്ഛൻ അവൾ പറഞ്ഞത് മനസ്സിൽ ആവാതെ അവനിൽ തന്നെ തിരിഞ്ഞു...
"എടാ ഇങ്ങോട്ട് നോക്ക്,,, എന്തെങ്കിലും ആവശ്യത്തിന് വണ്ടി പിടിച്ചു പോയാൽ തിരിച്ചു വരുമ്പോൾ നടന്നു വന്നാൽ മതി... കേട്ടോടാ കഴുതേ... "
അപ്പു ആ എന്നും തല ആട്ടി നിന്നു...
"എന്നാൽ പിന്നെ നോക്കി നിക്കാതെ ഈ മടല് മുഴുവനും എടുത്തു വെക്ക്... "
അയാൾ പോയതും അപ്പു എല്ലാം പെറുക്കി എടുക്കാൻ തുടങ്ങി...
ബാഗും വലിച്ചു എറിഞ്ഞു അവൾ അടുക്കളയിൽ ചെന്നു അമ്മ ഉണ്ടാക്കി കൊണ്ടിരിക്കുന്ന പഴം പൊരി എടുത്തു കടിച്ചു...
"ഈ അപ്പു ഏട്ടന് വായിൽ എന്തിനാ നാവ്,,, ആവശ്യത്തിന് സംസാരിക്കില്ല... "
അവൾ സ്വയം പറഞ്ഞു അത് വീണ്ടും കടിച്ചു കൊണ്ടിരുന്നു...
"അവന് നിന്നെ പോലെ അച്ഛനോട് കടിച്ചു കീറാൻ പറ്റുമോ... നിന്നോട് പറയാൻ ആവാത്തത് പോലും അച്ഛൻ അവനോട് ആണ് തീർക്കുന്നത്... "
ചേച്ചി വയറും താങ്ങി പിടിച്ചു വരുന്നത് കണ്ടു മീനു അവളെ പിടിച്ചു ചെയറിൽ ഇരുത്തി പഴം പൊരി എടുത്തു കൊടുത്തു...
മീനാക്ഷിയും അച്ഛനും അമ്മയും ചേച്ചിയും ആണ് ആ വീട്ടിൽ ഉള്ളത്,,, ചേച്ചി ആദ്യ ഡെലിവറി പ്രമാണിച്ചു വീട്ടിൽ ആണ് ഇപ്പോൾ,,, അതിന് കൂടി കാശ് ചിലവാക്കേണ്ട ടെൻഷൻ ആണ് അച്ഛന്...
ഇവരെ കൂടാതെ പുറത്തുള്ള മുറിയിൽ ഒരാൾ കൂടി ഉണ്ട്,,, അച്ഛന്റെ ഒരേ ഒരു പെങ്ങളെ മോൻ അപ്പു,,, അച്ഛൻ എന്നോ നാട് വിട്ടു പോയി,,, അമ്മയും കൂടി പോയപ്പോൾ വിളിച്ചു കൊണ്ട് വന്നതാണ് അപ്പുനെ,,, ഒരു ജോലിക്കാരൻ ആയാണ് എന്ന് മാത്രം...
എല്ലാ ജോലിയും അവന്റെ തലയിൽ ആണ് കൊണ്ട് ഇടുന്നത്,,, എല്ലാം ഭംഗി ആയി ചെയ്താലും ഒടുക്കം അവന് കിട്ടുന്നത് കുറെ ചീത്ത മാത്രം...
എല്ലാം അടക്കി വെച്ചു അപ്പു വന്നത് അടുക്കളയിൽ ആണ്,,, അമ്മ അവന് ചായ കൊടുക്കുമ്പോ അവൻ മീനുനെ നോക്കി ഒന്ന് പുഞ്ചിരിച്ചു... മീനു അവനെയും പുച്ഛിച്ചു കൊണ്ട് അകത്തേക്ക് പോയി...
◼️◼️◼️◼️◼️◼️
മീനു കാലത്ത് തന്നെ പേപ്പർ അരിച്ചു പെറുക്കാൻ തുടങ്ങി... പല ജോബ് ഓഫർ കണ്ടു അതെല്ലാം വെട്ടി എടുത്തു പോക്കെറ്റിൽ ഇട്ടു...
കുളി ഒക്കെ കഴിഞ്ഞു കോളേജിൽ പോകാൻ റെഡി ആകുമ്പോൾ ആണ് വീണ്ടും അച്ഛന്റെ കലാ പരിപാടിക്ക് തുടക്കം ഇട്ടത്,,, മീനു പല്ലും കടിച്ചു ബാഗും തൂക്കി താഴേക്ക് വന്നു...
"ഇത് കാശ് കൊടുക്കുന്നത് കൊണ്ടാണ് അവർ ഇവിടെ കൊണ്ട് ഇടുന്നത്... അല്ലാതെ നിന്റെ അച്ഛന്റെ വക അല്ല... എല്ലാം കൂടി അവൻ വെട്ടി നശിപ്പിച്ചു വെച്ചിരിക്കുന്നു... "
താൻ വെട്ടി എടുത്ത പേപ്പർ നീട്ടി കൊണ്ട് വഴക്ക് പറഞ്ഞു കൊണ്ടിരിക്കുന്ന അച്ഛനെയും എല്ലാം കേട്ട് കൊണ്ടിരിക്കുന്ന അപ്പുനെയും അവൾ നോക്കി...
അവൾക്ക് ദേഷ്യം വന്നത് അപ്പുന്റെ ആ നിൽപ്പ് ആയിരുന്നു... അവൾ അവനെ തുറിച്ചു നോക്കി അടുത്തേക്ക് ചെന്നു...
"അത് ഞാൻ ആണ് വെട്ടി എടുത്തത് അല്ലാതെ അപ്പു ഏട്ടൻ അല്ല,,, എനിക്ക് എക്സാം കഴിഞ്ഞാൽ പഠിക്കേണ്ട കോഴ്സ് ഉണ്ടായിരുന്നു അതാ വെട്ടി എടുത്തത് അതിന് ആരുടെയും മെക്കിട്ട് കയറിയിട്ട് കാര്യം ഇല്ല... "
അവൾ അച്ഛനെ നോക്കി പറഞ്ഞു...
"എനിക്ക് തോന്നി നീയേ ഇങ്ങനെ ഒക്കെ കാണിക്കൂ എന്ന്,,, എക്സാം കഴിഞ്ഞാൽ നിന്നെ ഇനിയും ഇവിടെ നിർത്തി പഠിപ്പിച്ചു അതെല്ലാം എന്റെ മെക്കിട്ട് തീർക്കുന്നതിനെക്കാൾ നല്ലത് നിന്നെ കെട്ടിച്ചു വിടുന്നത് ആണ്... "
"ഓഹ് അത് അച്ഛൻ അല്ല ഞാൻ തീരുമാനിക്കും... "
അച്ഛനെ നോക്കി അതും പറഞ്ഞു അവൾ അപ്പുനെ ഒന്ന് നോക്കി...
"നാണം ഇല്ലേ അപ്പു ഏട്ടന് ചെയ്യാത്ത കാര്യത്തിന് പഴി കേൾക്കാൻ... കഷ്ടം... "
അവൾ അവനെയും പുച്ഛിച്ചു കൊണ്ട് വണ്ടിയും എടുത്തു പോയി,,, അപ്പു അവള് പോയ ഭാഗത്ത്‌ നോക്കി നിന്നു...
◼️◼️◼️◼️◼️◼️
എല്ലാരും ഉറങ്ങി എന്ന് കണ്ടതും മീനു എണീറ്റ് പോയത് അപ്പുന്റെ മുറി ലക്ഷ്യം വെച്ചു കൊണ്ടാണ്,,, ഡോർ തട്ടി വിളിക്കുമ്പോ ആണ് അകത്ത്‌ നിന്നും അടച്ചില്ല എന്ന് കണ്ടത്,,, അവൾ അതും തള്ളി തുറന്നു അകത്തേക്ക് കയറി അവന്റെ കിടപ്പ് നോക്കി ഒന്ന് നിന്നു...
എവിടെയോ കിടക്കുന്ന മാറ്റ് തലയിണ,,, വേറെ എവിടെയോ കിടക്കുന്ന അപ്പുവും,,, അവൾ ഒന്ന് ചിരിച്ചു കൊണ്ട് അവിടെ കുനിഞ്ഞു ഇരുന്നു അവനെ തട്ടി വിളിച്ചു...
അലറാൻ വേണ്ടി വാ തുറന്ന അവന്റെ വാ അടച്ചു പിടിച്ചു അവിടെ ഇരുത്തി...
"എന്തിനാ നീ ഇങ്ങോട്ട് വന്നത്... "
കയ് മാറ്റിയപ്പോ അവളെ നോക്കി അവൻ ചോദിച്ചു...
"ദേ ഒരൊറ്റ ഒന്ന് അങ്ങ് തന്നാൽ ഉണ്ടല്ലോ,,, ഞാൻ ഈ കഷ്ടപ്പെട്ട് വന്നത് അപ്പു ഏട്ടന്റെ കാര്യത്തിന് വേണ്ടി തന്നെയാ,,, എപ്പോഴും അച്ഛന്റെ ചീത്തയും കേട്ട് ഇവിടെ തന്നെ കഴിയാൻ ആണോ പ്ലാൻ... "
"പിന്നെ ഞാൻ എന്ത് ചെയ്യാനാ,,, അച്ഛൻ വഴക്ക് പറയുന്നത് എന്നോട് ഉള്ള സ്നേഹം കൊണ്ടാ അല്ലാതെ... "
"നന്നായി,,, ദേ ഇത് നോക്ക് മദ്രാസിൽ നല്ല ഒരു ജോബ് ഓഫർ ആണ്,,, അപ്പു ഏട്ടൻ നാളെ തന്നെ പോയിക്കോണം,,, കാലത്ത് റെഡി ആയി നിന്നോ ടിക്കറ്റ് ഞാൻ എടുത്തു,,, റെയിൽവേ സ്റ്റേഷനിൽ ഞാൻ കൊണ്ട് വിടാം... എന്ത് ജോലി ആയാലും അതും ചെയ്തു അവിടെ അടങ്ങി നിന്നോണം... വെറുതെ അച്ഛന്റെ വായിൽ ഇരിക്കുന്നത് കേൾക്കാൻ നിക്കാതെ ഇത് ചെയ്യുന്നത് ആവും നല്ലത്... "
"ഒരു പേപ്പർ ഒക്കെ നോക്കി എന്ത് വിശ്വസിച്ചു പോകും... "
അവൻ ദയനീയമായി ചോദിക്കുന്നത് കേട്ട് കലിപ്പിൽ അവൾ അവനെ നോക്കി...
"പെൺകുട്ടി ഒന്നും അല്ലല്ലോ,,, ഒന്നുല്ലേലും അപ്പു ഏട്ടൻ ഒരു ആണല്ലേ... ശ്രമിച്ചു നോക്ക്... "
"അത് വേണോ മീനുട്ടി,,, എനിക്ക് അവിടെ ഒന്നും ആരെയും പരിചയം ഇല്ലല്ലോ... "
"ദേ അപ്പു ഏട്ടാ മുടക്ക് പറഞ്ഞാൽ ഉണ്ടല്ലോ,,, നമ്മൾ ഇപ്പോൾ ഒരു കോളേജിൽ ചെല്ലുന്നത് പരിചയം ഉള്ളോണ്ട് ആണോ അല്ലല്ലോ,,, അവിടെ ചെന്നിട്ട് എല്ലാരേയും പരിചയപ്പെടുന്നത് അല്ലേ ഇതും അങ്ങനെ കണ്ടാൽ മതി,,, sslc ആണ് യോഗ്യത,,, അപ്പു ഏട്ടന് അത് ഉണ്ടല്ലോ പോയി നോക്ക് എന്നെ... ശരി ആയില്ലെങ്കിൽ തിരിച്ചു വന്നാൽ മതി... "
അവളുടെ ആവേശം കണ്ടു അവൻ സമ്മതിച്ചു...
"അപ്പോ കാലത്ത് റെഡി ആയി നിക്കണം കേട്ടല്ലോ... "
അവന്റെ കവിളിൽ പിച്ചി കൊണ്ട് അതും പറഞ്ഞു അവൾ പോയി,,, അവൻ കവിളിൽ കയ് വെച്ചു ഒന്ന് ചിരിച്ചു കൊണ്ട് അതിലേക്ക് നോക്കി...
◼️◼️◼️◼️◼️◼️
മീനു റെഡി ആയി താഴേക്ക് വരുമ്പോ അച്ഛൻ അവൻ പോകാൻ റെഡി ആയി നിക്കുന്നത് കണ്ടു കലിപ്പിൽ നിക്കുന്നത് ആണ് കണ്ടത്...
"നിനക്ക് ഇന്ന് കോളേജ് ലീവ് അല്ലേ നീ എങ്ങോട്ടാ... "
അച്ഛൻ അവൾ വണ്ടി എടുക്കുന്നത് കണ്ടു ചോദിച്ചു...
"ഞാൻ അപ്പു ഏട്ടനെ റെയിൽവേ സ്റ്റേഷനിൽ കൊണ്ട് വിട്ടു വരാം... "
"അവൻ പോണം എങ്കിൽ എങ്ങനെ എങ്കിലും പോയിക്കോളും നീ എന്തിനാ കൊണ്ട് വിടുന്നെ... "
"ദേ അച്ഛാ ഒരുമാതിരി ഊള സ്വഭാവം എന്റെ അടുത്ത് എടുക്കാൻ നിക്കണ്ട,,, ഞാൻ അപ്പു ഏട്ടന്റെ കൂടെ നാട് വിടാൻ ഒന്നും പോണില്ല... "
അവൾ വണ്ടി സ്റ്റാർട്ട്‌ ചെയ്തപ്പോൾ അവൻ എല്ലാരേയും ഒന്ന് നോക്കി വണ്ടിയിൽ കയറി ഇരുന്നു... അവളുടെ പിറകെ കയറി ഇരിക്കുന്ന കണ്ടു അച്ഛൻ ദേഷ്യം കടിച്ചു പിടിച്ചു നിന്നു...
"എന്ത് കാണാൻ നിക്കാ രണ്ടും,,, കേറി പോടീ അകത്ത്‌... "
രണ്ടിനോടും ദേഷ്യം തീർത്തു അച്ഛൻ അകത്തേക്ക് ചെന്നു,,, സ്വസ്ഥത കിട്ടാതെ വീണ്ടും പുറത്തേക്ക് തന്നെ വന്നു...
അപ്പു അവളുടെ പുറം കഴുത്തിന്റെ ഭംഗി ആസ്വദിച്ചു കൊണ്ട് ഇരിക്കുക ആയിരുന്നു...
"അപ്പു ഏട്ടന് പേടി ഉണ്ടോ...? "
അവളിൽ നിന്നും പെട്ടെന്ന് കേട്ട ചോദ്യം കേട്ട് അവൻ ഇല്ലെന്ന് പറഞ്ഞു കൊണ്ട് വീണ്ടും അവളുടെ അടുത്തേക്ക് ഒന്ന് കൂടി നീങ്ങി...
"ഇന്റർവ്യൂ വല്ലതും ഉണ്ടെങ്കിൽ പേടിക്കണ്ട കേട്ടല്ലോ കിട്ടിയില്ല എങ്കിൽ പോട്ടെ ഇങ്ങോട്ട് തന്നെ വന്നേക്കണം കേട്ടല്ലോ,,, വേറെ ജോലി കണ്ടു പിടിച്ചു തരുന്ന കാര്യം ഞാൻ ഏറ്റു... "
"മ്മ്... "
അവൻ അലസതയോടെ ഒന്ന് മൂളി...
"അവിടെ എത്തിയാൽ വിളിക്കണം കേട്ടല്ലോ,,, മറന്നാൽ ഞാൻ എന്നെങ്കിലും കണ്ടാൽ തിരിച്ചു തരും... "
അവൻ എല്ലാം കേട്ടു മൂളികൊണ്ടിരുന്നു,,, അവൾ ആണെങ്കിൽ അവിടെ എത്തുന്നത് വരെ ഓരോ ഉപദേശം കൊടുത്തു കൊണ്ടിരുന്നു...
അവൾ വണ്ടിയിൽ നിന്നും ഇറങ്ങി ഒരു കൊച്ചു കുട്ടി എന്ന പോലെ ആ തിരക്കിൽ കയ് പിടിച്ചു നടന്നു,,, അവനെ സീറ്റ് നോക്കി ഇരുത്തി അവൾ പുറത്തേക്ക് ആയി വന്നു നിന്നു...
അവളെ നോക്കി ഒന്ന് പുഞ്ചിരിച്ചു എങ്കിലും അവന്റെ ഉള്ളം നീറി തുടങ്ങി,,, ട്രെയിൻ നീങ്ങി തുടങ്ങുന്നത് കണ്ടു അവൾ റ്റാറ്റാ കാണിച്ചു,,, അവനും തിരിച്ചു കാണിച്ചു അകത്തേക്ക് നീങ്ങി ഇരുന്നു...
◼️◼️◼️◼️◼️◼️
"ഓഹ് ഈ അച്ഛന് ഇന്ന് ആരെയാ കിട്ടിയത്,,, കാലത്ത് തന്നെ തുടങ്ങി അല്ലോ... "
മീനു അച്ഛന്റെ ചീത്ത പറച്ചിൽ കേട്ട് ഉറക്ക പിച്ചിൽ താഴേക്ക് ഇറങ്ങി വന്നു നോക്കി...
മുന്നിൽ എല്ലാം കേട്ട് കയ്യിൽ ബാഗും പിടിച്ചു നിക്കുന്ന അവനെ കണ്ടു അവൾ കണ്ണും മിഴിച്ചു നോക്കി... രാവിലെ തന്നെ കയ് നീട്ടം വാങ്ങാൻ ആണോ വന്നത്...
"ടിക്കറ്റ് കാശ് നിന്നെ കൊണ്ട് വിടാൻ അവൾ ചിലവാക്കിയ പെട്രോൾ എല്ലാം എന്റെ പണം ആണ്,,, എന്നിട്ട് അവൻ പോയ പോലെ വന്നിരിക്കുന്നു... എല്ലാം അവൾ ആണ് നിന്നെ കൊണ്ട് ചെയ്യിppച്ചത് എന്ന് എനിക്ക് അറിയാം... നിനക്ക് ഞാൻ തരുന്ന പണി തന്നെ ദാരാളം അല്ലാതെ വേറെ എവിടെ നിന്നും പണി കിട്ടാൻ... "
അച്ഛന്റെ നീണ്ട പ്രസംഗം കേട്ട് അവൾ അവന്റെ അടുത്തേക്ക് ചെന്നു...
"എന്താ ജോലി ശരിയായില്ലേ... "
"ഇല്ല അവിടെ പറയുന്ന ഭാഷ പോലും എനിക്ക് മനസ്സിൽ ആയില്ല... "😩
അവൻ നിരാശയോടെ അതും പറഞ്ഞു തലയും താഴ്ത്തി നിന്നു... അത് കേട്ട് കൊല ചിരി പോലെ അച്ഛൻ നന്നായി പൊട്ടി ചിരിച്ചു...
അവൾ രണ്ടിനെയും നോക്കി പുച്ഛിച്ചു കൊണ്ട് അകത്തേക്ക് നടന്നു...
പിന്നീട് അങ്ങോട്ട് അവൾക്ക് പേപ്പർ കണി കാണാൻ കിട്ടിയില്ല എന്ന് വേണം പറയാൻ,,, അച്ഛൻ എല്ലാം എടുത്തു മാറ്റി വെച്ചു...
◼️◼️◼️◼️◼️◼️
ഒത്തിരി സന്തോഷത്തോടെ ആണ് മീനു വീട്ടിലേക്ക് വന്നത്,,, വണ്ടിയും അവിടെ ഇട്ടു അവൾ അകത്തേക്ക് കയറി...
"അമ്മേ അപ്പു ഏട്ടൻ എവിടെ... "
"അച്ചൻ അവനെയും കൊണ്ട് എങ്ങോട്ടോ പോയി... "
അവൾ മുറിയിൽ ചെന്നു ബാഗിൽ നിന്നും ഒരു ഫയൽ പുറത്തേക്കു എടുത്തു,,, ഗൾഫിലെക്ക് പറക്കാൻ ഉള്ള വിസ എടുത്തു ഒന്ന് കൂടി അവൾ നോക്കി,,, തന്റെ കൂട്ടുകാരിയുടെ അച്ഛന്റെ കാല് പിടിച്ചു അവന് വേണ്ടി വാങ്ങി എടുത്ത ജോലി...
"നിങ്ങൾ ഇവിടെ നിന്നും രക്ഷപെടണം അപ്പു ഏട്ടാ,,, അതിന് വേണ്ടിയാ ഞാൻ ഇത് ഒപ്പിച്ചത്... "
അതും പറഞ്ഞു അതിലേക്ക് നോക്കി വീണ്ടും അത് ബാഗിൽ വെച്ചു...
രാത്രി ആണ് അച്ഛൻ അപ്പുനെയും കൊണ്ട് വന്നത്,,, അച്ഛൻ കേട്ടാൽ എല്ലാം തകർക്കും എന്ന് ഓർത്തു എല്ലാരും ഉറങ്ങുന്നത് വരെ അവൾ കാത്തിരുന്നു...
ഡോർ തുറന്നു അപ്പുന്റെ മുറിയിൽ ചെന്നപ്പോ ലോക്ക് ചെയ്തത് കണ്ടു അവൾ തട്ടി വിളിച്ചു... ഒരുപാട് നേരം വിളിച്ചതിന് ശേഷം ആണ് അവൻ ഡോർ തുറന്നത്...
"എന്താ വല്ലാതെ ഇരിക്കുന്നെ പനി വല്ലതും ഉണ്ടോ... "
കയറിയപാടെ അവന്റെ മുഖം കണ്ടു അവൾ നെറ്റിയിൽ കയ് വെച്ചു കൊണ്ട് ചോദിച്ചു...
"ഏയ് പനി ഒന്നും ഇല്ല,,, എന്താ നീ ഈ നേരത്ത് വന്നത്... "
അവൾ കയ്യിൽ ഉള്ള പേപ്പർ അവന് നേരെ നീട്ടി...
"ദുബായിലേക്ക് ഉള്ള വിസ ആണ്,,, എല്ലാം ഞാൻ എന്റെ ഫ്രണ്ട്സിന്റെ അച്ഛനോട് പറഞ്ഞു സംഘടിപ്പിച്ചു എന്ന് വേണം പറയാൻ,,, അപ്പു ഏട്ടന് ഇങ്ങനെ ഇവിടെ നിന്നും കഷ്ടപ്പെടെണ്ട ആളല്ല,,, അത് കൊണ്ട് പോയെ പറ്റൂ രണ്ട് ദിവസം സമയം ഉണ്ട്... "
എന്ത് പറയും എന്ന് അറിയാതെ അവൻ അതും നോക്കി ഇരുന്നു...
"എനിക്ക് ഇതൊന്നും വേണ്ട ഞാൻ എങ്ങോട്ടും പോകുന്നില്ല... "
"ദേ അപ്പു ഏട്ടാ എന്നെ വെറുതെ ദേഷ്യം പിടിപ്പിക്കരുത്... എന്നും ഇവിടെ നിന്നു അച്ഛന്റെ വായിൽ ഇരിക്കുന്നത് കേൾക്കാൻ ആണോ പ്ലാൻ... "
"ഞാൻ എങ്ങോട്ടെങ്കിലും പോയിക്കോളാം,,, അതിന് നീ ഇങ്ങനെ കഷ്ടപ്പെടെണ്ട ആവശ്യം ഒന്നും ഇല്ല... "
"അപ്പു ഏട്ടന് നല്ലോരു ജീവിതം കിട്ടുന്നത് വരെ ഞാൻ ഇങ്ങനെ കഷ്ടപ്പെടും പോരെ,,, അത് ഇഷ്ട്ടം ആയില്ലെങ്കിൽ ഉള്ളിൽ വെച്ചോ ഞാൻ ചെയ്യും,,, വേഗം ഇവിടെ നിന്നും രക്ഷപെട്ടു നല്ല ജോലിയും സാലറിയും ഒക്കെ ആയി വന്നു നല്ലോരു പെണ്ണിനെ കണ്ടു പിടിച്ചു കെട്ടാൻ നോക്ക്,,, ഇയാൾ തിരിച്ചു വരുമ്പോഴേക്കും നല്ലോരു പെണ്ണിനെ ഒക്കെ ഞാൻ കണ്ടു പിടിച്ചു വെച്ചോളാം പോരെ... "
മീനു അതും പറഞ്ഞു അവന്റെ കവിളിൽ തട്ടി ചിരിച്ചു കൊണ്ട് പുറത്തേക്കു പോകാൻ നിന്നതും അവന്റെ കയ് അവളിൽ പിടി വീണു...
